Ego Fridricus canonicus in Reichersperg et plebanus parrochye dicte ecclesie in Promperch profiteor et protestor tenore presencium conspectoribus vniuersis, quod scolaris quidam, puer adhuc, nomine Perchtoldus nacione de Hainburch venit ad parochiam meam anno nunc tercio et se dicte parochic honesto viro et religioso domino Wernhero vicario meo conpresbitero et concanonico de Reichersperg seruicio mancipavit. Qui, cum ibidem aliquamdiu remansisset in bona confessione, vocante se domino paucis diebus lectulo recubans est defunctus. Porro, sicut predictus dominus Wernherus, predicti scolaris dominus temporalis, nobis, mihi videlicet et aliis fide dignis personis, quorum nomina subscribuntur, in verbo sacerdotis et sua conscientia est confessus, idem sepenominatus scolaris ante horam sue defunctionis sana mente et integra ratione vocato ad se ipso domino Wernhero post confessionem ac perceptionem diuinorum sacramentorum omnibus, que ad se iure hereditario pertinebant, videlicet una domo Haimburge et quibuslibet aliis rebus sui iuris, exprimens ea singula sigulatim, licet mihi diuturnitate temporis a memoria exciderint, domui sancte crucis legauit, in qua reliquit fratrem superstitem monachum et dyaconum Christo domino famulantem, per quem scilicet monachum sancte crucis, nomine fratrem hyrzonem, predicta domus et alia ad eum fuerant devoluta. Igitur in euidenciam omnium predictorum mittere curaui prenominato monasterio sancte crucis cum apensione sigilli mei et denominatione aliquorum testium presens scriptum. Fuerunt autem testes et presentes Fridricus et Wernherus, canonici ordinis sancti Augustini in Reichersperg. Frater Georgius de sancta cruce. Ditricus de Půch. Heinricus Faber. Dietmarus Oschel et alii quam plures. Actum et datum anno domini M.° CC.° LXXXIV.°

Source Fulltext: WEIS, Heiligenkreuz (=FRA II/11, 1856) S. 276