Ich Ortolf genannt der Mv^oerl von Botendorf tv^oen ze wizzen an disem brief allen læuten, die in nv lesent oder noch lesent werdent, daz ich mit gv^oetem willen vnd mit meins svns Ottens, vnd ouch meiner tochter Diemv^oet, vnd aller meiner vreunt verhanchnusse lazzen han von den Chriech, der zwischen mier gewesen ist vnd dem abt vnd ouch der samnung von dem hailigen Chræutze vmb svmleich gvet ze Chaltengang, da ich vnd ouch mein erben ansprach ovf gehabt haben, vmb einen widerwechsel siben luzze, der einer haizzet des Chohs lvz, die andern sehs lvzze die moslvzze, die sie mier ovzbeschaiden habent zve vvnf luzzen, die si mier ouch ê beschaiden vnd gegeben heten, daz ichs besitzen schol vnd ouch mein erben mit allen dem reht, vnd sis besezzen habent. Darvmb verzeih ich mich vnd widersag allem dem reht, alles des gv^oetes, des ich ze Chaltengang gehabt han, dar ouf ich rehtes geiehen han, also daz ich, noch alle meine erben, noch alle mein vreund den abt noch dev Samnung an demselben gv^oet noch an allen ierm gv^oet nimmermer gevnrveben scholl mit dehainerlaie sache, swie dev genant ist, svnder daz si mit vrid beleiben, vnd iz besitzen ewigleich mit aller rv^oe. Daz diser gewerft, der zwischen vns ergangen ist vor so manigem vrumen manne, stæt beleib vnd vnverwandelt, des gib ich dem vorgenanten abt vnd der Samnung disen brief versigelten mit meiner dreier heren, hern Hainreichs, hern Chv^onrates, hern Seibotes insigel von Botendorf, und ouch hern Ebergers des ritter von Botentorf, und setzen darzve die gezeug vor den, vnd mit der gewizzen iz geschehen ist. Mein vorgenannt hern her Hainrich, Her Chunrad, her Seibot, her Eberger, her Herwort de Tovsentphvnt, her Chvenratt von Techenstein, her Otachar von Ebreichsdorf, her Haidenreich, her Ott der Rovber, her Fridrich von Erla, her Hainrich von Svltz, vnd ander vrumer læut genvech. Daz ist geschehen nah vnsers heren gebvrd tovsent iar, zwai hundert iar, vnd an dem vier vnd neuntzegisten iar.

Source Fulltext: WEIS, Heiligenkreuz (=FRA II/11, 1856) S. 277