Ich Pilgreim Hern Paltrams sun vergih vnd tv^oen chv^ont allen den, di disen brief lesent oder horent lesen, di nv lebent oder her nah chvmftich sint, daz ich mit gvetem willen vnd verdahtem mvet, vnd ouch mit gveter gvnst meiner svne Paltrams vnd Pilgreims vnd ouch ander meiner erben, dev noch zv ier iarn niht chomen sint, daz ist Mœhthilt, Haym, Margret vnd Jans, fvr dev wier baidev, ich Pilgreim vnd ouch mein baide svn die vorgenanten Paltram vnd Pilgreim rechter scherm werden, vntze si zv ier iarn chomen, var daz gvet, als her nah benant wiert, daz sint vvnf phvnt wienner phenning gæltes, dev ich durch got vnd durch meiner hovsvrowen sel willen vron Mœhthilden, der got genade, vnd ouch durch meiner selben sel willen meines rehten gvetes geschaft han dem Chlo^ester vnd dem Conuente datz dem Hailigen Chrœutze ewichleih ze haben also, daz man iærleich vnd ewichleich dem Conuent des selben Chlo^esters an dem Mæntage in der Chræutzwochen isleichem brveder geb ain stukch vische, vnd des næhsten Eritages darnah aver ein stvkche vische, vnd des næhstem Mittechens darnah, daz ist an vnsers hern avfvart abvnt, aver ein Stukche vische, vnd Semelein bro^et, vnd bezzern wein, dann ier rechtev phrvent sei. Vnd wil ouch daz, daz man an dem sælben vorgenanten Mittechen iærleich vnd ewichleich meiner Hovsvrowen iartach der vorgenanten vron Mœhthilden vnd ouch mein Pilgreims iartach bege, vnd swann got vber mich gebiete vnd swa ich in dem Lande stærbe, da schvln mich die vorgenanten heren von dem Hailigen Chrœutze nemen mit ier choste vnd schvln mich bringen hintz ier Chlo^ester, vnd schvln mich da bestatten in meiner hovsvrowen grab, vnd schvln vvrbaz vnser baider iartach mit einander begen an dem Mittechen als vor benant ist. Der vor genanten vinf phvnt geltes der leit ainez ouf Penditen hovs des Juden ze wienne ovf dem hovse, daz da leit ze næhste bei dem schvl hof der Juden. Daz schaff ich in ewichleich ze haben, daz schol man in dienen mit einander alle iar an sand Michels tage, vnd die andern vierev schol man in dienen ze Mœtzleinsdorf von aechern, von Weingarten, von phenninch gælt vnd von allem dem, daz ich da han nach Purchrehtes reht, dreistvnd in dem Jar ze Weinahten, ze sand Gorgen messe, vnd an sand Michelstage ze isleicher zeit ein phvnt vnd achtzich phenning, vnd schvln dev dienen mein holden, oder swer daz sælb gv^oet in gwer vnd in gwalt hab‚ also mit beschaidner red, ob ich Pilgreim oder mein erben so stathaft werden, daz wier dev selben vo^ergenanten vier phvnt gæltes ab schvln lo^esen mit anderm gælt, der in als gvet sei. Vnd die sælben vinf phvnt gæltes schol alle iar innemen der Siehmaister von dem hailigen chrœutze, swie der dann genant sei, vnd schol den Conuent alle iar davon besehen des, als vorgeschriben ist. Vnd swa man dem Conuent des niht enlaist, als vorbenant ist, so schol ich Pilgreim oder mein erben mich des vorgenanten gvetes vnderwinden, vnd schvln wider ouf mich oder ouf mein erben gevallen. Daz disev red also stæt sei vnd immer vestichait hab‚ dar vber gib ich dem vor genanten Chloster vnd dem Conuent disen brief, vnd zeinem vrchvnd diser sache, vnd han in den bestætigt mit meinem insigel vnd mit hern Haymen insigel, hern Offen svns, meines geswein, vnd mit disen gezeugen, die hernah geschriben sint, daz ist her Hainreich mein Capplan von sand Margreten. Her Ott, hern Halmen brveder. Her Paltram der Vatz. Her Rveger an dem Witrnarcht. Her Paltram sein brveder. Hainreich mein brveder. Her Paltram ouf der Slahstvben. Her Hainreich hern Tyemen brveder. Her Fridreich der Stadlower. Her Johan der schreiber in der Slahstuben, vnd andre vrume læut genvech. Diser brief ist gegeben ze Wienn des Jars nah vnsers Heren gebverd an dem Tovsentisten zwaihvndertisten vnd vier vnd Neuntzegisten iar an sand Gilgen tage.

Source Fulltext: WEIS, Heiligenkreuz (=FRA II/11, 1856) S. 272-273