Jch Wichart von Arnstein tv^en ze wissen allen den, di disen brief lesent sint, daz ich dem abt Vlreich vnd der Samnung datz dem heiligen Crevtz versetze min mvl vnder minem hows, dev da haizzet Mitter Mvl, vv^er fvmf phunt pfenning, dev ich in schuldich belaib an dem tag, do min vater do bestattet wart, zwai pfund beraitter pfenning, dev ich datz in entnam, vnd drev pfund vv^er die Choste, also daz der abt vnd dev Samnung die vorgenantev mvl mit dienst vnd mit nutzze schullen inne haben, vntz si sich fvmf pfvnt ab vergelte. Zeiner stetichait diser dinge vnd zeinem v^erchund gib ich in disen brief versigelt mit mins vetern hern Chunrates von Arnstein vnd mit min selbes Insigel. Der Satzung sind ovch gezevch Herr Levpolt von Sachsengang vnd sin svn, Her Otto von Wildekke vnd sin bruder Rapot, Herr Rapot von Arnstain, vnd ander vrumer lewt vil. Dieser brief ist gegeben an dem mæntag vor vnser vrowen tach zv der Liehtmesse, nach christes gebv^ert vber towsent zwai hundert vnd in dem subenten vnd Newntzigisten Jar.

Source Fulltext: WEIS, Heiligenkreuz (=FRA II/11, 1856) S. 284-285