Ich Ortolf von Atzenprvcken, vnd ich Gerbirch sein Havsvrowe vnd ich Fridrich vnd ich Albrecht ir svne Vnd ich Margret vnd ich Diemvt vnd ich Agnes und ich Gerttravt ir tohter. Wir veriehen vnd tun chunt allen den, di disen prief lesent oder horent lesen, die nv lebent vnd hernah chunftich sint, Daz wir mit vnser erben gutem willen vnd gvnst, vnd mit verdahtem mvte vnd mit zeitigem rat aller vnser Frivnde, hern Weichartes vnd hern Chadoldes von Pavmgarten, vnd ander vnser Frivnde vnd mit gesampter hant zv der zeit, do wir iz wol getvn mohten, verchauft haben vnsers rehten aigens, fivnf phvnt phenninge geltes vnd zehen phenninge geltes wienner mvntz avf vier lehen da ze Haedrichestorf vnd daz Gerihte da selbens ze Haedrichestorf. Daz vorgenant gvt alles haben wir geben mit allem dem nvtz vnd reht, als wir iz in aigens gewer her praht haben, vmb Sibinzich phvnt wienner phenninge, der wir reht vnd redlichen gewert sein, dem erbaern manne prvder Vlrichen, der zu den Zeiten Apt was vnd der Samnunge gemaine von dem Hailigen Chrevtzze, lediglichen vnd vreilichen ze haben, vnd allen irn frvmen da mit ze schaffen, verchavffen versetzen vnd geben swem sie wellen an allen irresal. Vnd dar vber dvrch pezzer Sicherhait so setzen wir vns, ich Ortolf von Atzzenprvcken vnd ich Gerbirg sein havsfrowe vnd ich Fridrich vnd ich Albreht ir svne, vnd ich Margret, vnd ich Diemvt, vnd ich Agnes vnd ich Gerdravt ir Töhter vnd ich Weichart vnd ich Chadolt von Pavmgarten, vnverschaidenlichen dem vorgenanten prvder Vlrichen, der zv den zeiten Apt was, vnd der Samnvnge gemaine da zv dem Hailigen Chrevtze vber die vorgenanten fivnf phvnt phenninge geltes vnd vber die zehen phenninge geltes da ze Haedrichestorf, vnd vber daz gerihte da selbens ze Haedrichestorf ze rehtem scherme fvr alle ansprache als aigens reht ist vnd des Landes reht ze Osterreiche. Vnd geben in dar vber disen prief ze ainem sichtigen vrchvnde vnd ze ainem offen gezevge vnd ze ainer ewigen vestnvnge diser sache versigilten mit vnsern Insigiln. Vnd sint avch des gezevg her Alber von dem Clemens, her Dietmar sein veter. her Dietrich von sand Peternellen. her Wilhalm von Pavmgarten. her Chalhoh von Pavmgarten. her Chvnrat von Arnstain. her Marchart von Mistelbach. Marchart von Zelkingen. Hainrich von Atzzenprvcken. vnd ander frvme levte genvch, den dise sache vnd diser chavf wol chvnt ist. Diser prief ist geben ze Wienne, do von Christes gepvrt waren ergangen Tavsent Iar, Drev Hvndert Iar. In dem Dritten Iare dar nah. An sand Dionisien tage.

Source Fulltext: WEIS, Heiligenkreuz (=FRA II/16, 1859) S. 12-13