Nos Karolus dei gracia Hungarie, Dalmacie, Croacie, Rame, Seruie, Gallicie, Lodomerie, Cumanie, Bulgarieque Rex, memorie commendantes significamus vniuersis. quibus expedit presencium per tenorem, quod, cum ex officio suscepti regiminis intima sollicitudine et cura propensiori sacrosancte matris ecclesie „que in solidissima petra, que est christus, beatissirni Petri apostoli fide fundata existit, comodis et profectibus in uigitare debeamus, Honorabili Monasterio sancte Crucis de austria, ob specialis deuocionis affectum, quam erga ipsum Monasterium gerimus et habemus, quod in partibus Regni nostri per sacros progenitores nostros felicium recordacionem contemplacione diuini nominis est honorifice vberrimis decoratum donatiuis et dotatum, ac Abbati et fratribus in eodem deo iugiter famulantibus et deuote, has gracias et libertates fecimus, donauimus et concessimus speciales, quod Curie ipsius Monasterii sancte Crucis vna uidelicet in Posonio intra muros ipsius Ciuitatis, altera, que Curia Regis appellatur circa aquam Lytha, Tercia nouum predium dicta et alio nomine Newneygen uocata juxta lacum Fertheu existentes, ac villa vynden vocata juxta eundem lacum Fertheu sita ab omni dacia et collecta steura contribucione, solucione, seu exaccione qualibet nomine regio exigenda, vel Ciuitatum, seu quorumlibet exactorum aut exigere volentium libere sint et penitus exempte et absolute habeantur. Item volumus, quod dicti fratres Monasterii sancte Crucis vina sua, blada, seu fruges, ceteraque Monasterio, ipsorum ac vsibus eorundem necessaria libere et absque omni exaccione Mutarum seu theloneorum ac Tributorum ipsis in regno nostro Hungarie, vel alibi proueniencia per omnes partes regni nostri deuehi faciant seu deduci, tam in terris quam in aquis. Ceterum in omnibus Ciuitatibus, foris, villis locisque vniuersis per ambitum regni nostri constitutis per officiales seu seruitores nostros aut aliorum quorumcumque, quocumque nomine censeantur de numero vel mensura rerum suarum nullo ingenio, nullaque occasione artati, deponendi, locandi, vendendi, ac alias vtilitates de eisdem exercendi et ordinandi, liberam habeant perpetuo facultatem. Preterea ex affluencia gracie regalis dictis fratribus duximus annuendum, quod nulla persona cuiuscumque dignitatis status aut condicionis existat, quemlibet ad domos ipsorum seu Curias, aliasque possessiones quacumque de causa spe defensionis confugentem excipere, capere vel aliam quamcunque iniuriam inferre audeat uel presumat; et hoc precipue in Curia ipsorum fratrum Posoniensi volumus et precipimus firmiter obseruari. Item statuimus, quod si aliquis colonorum, uel hominum, aut Jobagionum dicti Monasterii et fratrum cuiuscumque cause uel nocumenti seu sedicionis pretextu morti adiudicaturus, Judex, ad quem huiusmodi persone Judicium pertinet, de sola eius persona habeat indicandi potestatem, rebus et bonis eiusdem vniuersis ad manus dictorum fratrum plene deuolutis, eo declarato et [50] adiecto, quod omnes causas inferiores, factum mortis non contigentes ipsi fratres per se uel per officiales suos possint iudicare. Ad hec ipsum Monasterium et fratres in eodem residentes peculiari quadam libertatis prerogatiua decorare volentes, ne per quempiam regni nostri Incolam cuiscumque dignitatis aut status existat, in suis Juribus et libertatibus disturbentur ipsos, vniuersasque possessiones eorumdem per Regni nostri climata existentes in aduocaciam et defensionem nostram recipimus specialem; Omnibus et singulis tam presentibus quam futuris regio edicto firmiter iniungentes, ne ceteri ad huiusmodi aduocaciam pretextu seu titulo alicuius hereditatis per progenitores eorumdem dicto Monasterio donate se intromittere presumant, sed iidem Abbas et fratres aduocatum seu defensorem vice persone nostre maiestatis, quem uoluerint, eligant et illo, si placet repudiato et reiecto quandocumque et quocienscumque eis uidebitur expedire, alium uel alios in ipsam aduocaciam eligant et assumant, qui ipsos possessionesque eorum vniuersas indempnes et illesas pure et simpliciter propter deum et non racione alicuius dacii uel pecunie ab eis quoquo modo recipiende et habende auctoritate regia teneatur conseruare. Si qui uero huiusmodi nostram salubrem ordinacionem et graciam dictis fratribus factam processu temporis uiolare presumpserit, uel eidem quoquomodo ausu temerario contraire attemptauerit, vlcione regie vindicte in rebus et persona punietur. In cuius rei memoriam perpetuamque firmitatem presentes concessimus litteras duplicis sigilli nostri munimine roboratas. Datum per manus Honorabilis viri magistri Johannis albensis ecclesie prepositi et archydiaconi kukullensis, dilecti et fidelis nostri aule nostre vice cancellarii XIIII°. Idus (sic. ? Kal.) Octobris anno domini Millesimo Trecentesimo Decimo septimo. Regni autem nostri anno similiter decimo septimo.

Source Fulltext: WEIS, Heiligenkreuz (=FRA II/16, 1859) S. 48-50