Ich Havg ze den zeiten Pharrer ze Dreeschirchen vnd ich Jevte die Werdeerin, Wir veriehen vnd tun chunt allen den, die disen Prief lesent oder horent lesen ‚ die nv lebent vnd hernach chvnftich sint, daz wir mit gvtem willen vnd mit vnsers Perchmaisters hant, Vlreichs des Hordekker lavterleichen dvrich Got vnd durch vnser vodern Sele Willen vnd avch dvrich vnser selber sele hail geschafft vnd geben haben zv der zeit, do wir es wol getun mochten, den erbern Herren Prvder Otten, ze den zeiten Apte vnd der Samnvnge gemaine von dem Hailigen Chrevtze, vnsers rechten Perchrechtes aynen Weyngarten, der da leit ze Engelschalichstorf vnd haizzet der Plinte, den der Pyttanzmaister datz dem Hailigen Chrevz mit Nvtze vnd mit dienste inne haben sol also beschaidenleichen, daz er da von geben sol aynem iegleichen Prvder von der Samnvnge dvrich daz Iare, so er zwai ayer hat, daz Dritte dar zv; vnd sol in da von geben alle Iare an dem Swartzen Svntage ayn gantzes dienst, aynem iegleichen Prvder zway Stvke Vische des Morgens vnd ayn Stvke des nachtes vnd ayn Semeln vnd pezzern Weyn, dann der Phrevnt Weyn sei, dar vmbe, daz sie vnser Sele vnd aller gelawbigen sele dester vleizzichleicher gedenchen. Iz habent avch die vorgenanten Herren Prvder Otte ze den zeiten Apte vnd die Samnvnge von dem hailigen Chreytze mit gemainem Rat irr Samnvnge vnd mit des vorgenanten Perchmaisters hant Vlreiches des Hordekker vns den vorgesprochen Weyngarten her wider lazzen zv aynem rechten Leypgedinge vntz an vnser paider tot, Vnd nach vnser paider tode sol derselbe weyngart zv aynem rechten Selgeret ewichleichen den Herren von dem Hailigen Chrevtze beleiben. Vnd wand vro Jaevte die Werdaerynn nicht aygens Insigils hat, da von so han ich Havge ze den zeiten Pharrer ze Dreeschyrhen fvr mich vnd fvr sie geben den vorgesprochen herren, Prvder Otten ze den zeiten Apte vnd der Samnvnge gemayne von dem Hailigen Chrevtze vnd allen irn nachchomen disen Prief zv aynem sichtigen vrchvnde vnd zv aynem waren gezeyge vnd zv ayner ewigen Vestnvnge dise sache versigilten mit meinem Insigil vnd mit des Perchmaisters Insigil Vlreiches des Hordekker, der diser Sache gezevge ist mit seinem Insigil, vnd ander frvm levte genvch, den dise Sache wol chvnt ist. Diser Prief ist geben ze Wienne, do von Christes gebvrt waren ergangen Drevzehen Hvndert Iar In dem ayn vnd zwainzigisten Iare dar nach, an Sant Mathyas tage.

Source Fulltext: WEIS, Heiligenkreuz (=FRA II/16, 1859) S. 65-66