Wir Friderich von gotes gnaden Römischer Chuning, allezit ein merer dez Riches Tun chunt mit disem prief allen den, die in ansehent, lesent oder horent lesen, Daz wir gesehen haben vnd gelesen ein Hantvestin, di Heinreich der Hantschutster von Pazsowe vnd Margrete sein Hausvrowe gegeben hat dem Abte vnd dem .. Conuent dez Closters von dem Heiligen Chrevtz vber einen weingarten ze Dorinpach in dem Scheuchen, dez anderhalp Jevch ist vnd der da leit zwischen der Teutschenheren weingarten vnd Seidleins weingarten des Roztuscher, vnd vber einen weingarten, der da leit ze Otachringen ob der Chirichen vnd haizzet Poytiner, der weilent ist gewesen Heinrich des Langen, vnd stet diselbe hantvest also. wan in die vorgenanten Weingarten vervallen sint mit rechte, daz der vorgenante abte vnd der Conuent zu dem heiligen Chrevtz allen iren frume vnd nutz schaffen mugen mit verchaufen vnd versetzen mit den selben Weingarten‚ swie ez in aller pest fuget. Dez loben wir vnd verihen ez mit disem prief, swer di egenanten weingarten chaufet oder ze pfande nimet von dem abte vnd von dem Conuent zu dem Heiligen Creutz, daz wir dez scherme sein, vnd daz wir in dieselben Weingarten schermen wellen nach dez landez rechte ze Osterrich. Vnd dez ze einen offen vrchunde geben wir diesen prief versigelt mit vnserm Chuniglichen Insigel. Der ist geben ze Wienne dez Svnnetags vor sant Merteins tag in dem sibenden Iar unseres Riches, da man zalt von Christes geburd drevzenhundert Iar darnach eins vnd zweinzich Iar.

Source Fulltext: WEIS, Heiligenkreuz (=FRA II/16, 1859) S. 79-80