Wir Albrecht von Gottes gnaden Bischof tze Pazzow Tun chunt allen den, die disen Brif sehent oder horent lesen, daz di Geistlichen Herren . . . der Abt von dem Heiligen Chreutz vnd di Samnung daselbs vns beweisent habent vnd ermant mit alten Hantuesten vnsrer voruadern, daz si vreyung habent auf der Tunow vnd auf dem yn tze fu^eren an Mautt vnd an Czol zway phunt Chuffen vnd sechtzehen Chuffen weites Saltzs vnd ain halb phunt chlainer Chufflein vnd zwen Stübich tze fullsaltz aller Jerchlich, vnd ist auch in den selben Hantuesten sunderlich auz gonomen di furuart, di sich zeuchet auf zwai phunt Pazzewer Pfenning, daz si der auch Ledig sullen sein. Di selb Hantuest vnd vreyung haben wir in verniwet vnd gegeben. Dar vmb gepieten wir ernstlich allen vnsern Richtern, Mauttern vnd andern vnsern amptleuten, daz si di vorgenanten Herren von dem Heiligen Chreutz furbaz an der vreyung nicht irren noch hindern, weder an der Mautt noch an der furvart noch Czol‚ vnd lazzen si der Genaden geniezzen, der wir vnd vnsre voruadern in haben gegeben. Dar vber tze vrchund geben wir den Brif versigelten mit vnserm anhangunden Insigel. Der ist geben cze wienn Nach Christes gepurd drevtzehen Hundert Iar dar nach in dem Dreuzzkisten Iar, des nächsten tags vor sand Pauls tag czder becherung.

Source Fulltext: WEIS, Heiligenkreuz (=FRA II/16, 1859) S. 130-131