Ich Herman van Wolfgersdorf vnd ich Agnes sein housvrow veriehen vnd tv^en chund allen den, di disen prief lesent oder horent lesen, di nv lebent vnd hernach chunftig sint, daz wi^er mit verdahtem mv^et vnd mit gesampter hant, mit vnser erben gu^etem willen vnd zv der zeit, do wir ez wol getu^en mohten, haben gegeben durch got vnd vnser sel vnd aller vnsern vodern sel hail willen den ersamen Geistleihen Herren, Apt Wvlfingen vnd der Samnung gemain ze dem Heiligem Chreutz vnsers rehten aigen gu^etes, zwen vnd viertzig Wienner phenning geltes‚ di gelegen sint ze Engelschalsdorf auf zwain hofsteten. Von der ainen dient Chunrad der Steinbrecher dreizig wienner phenning vnd Mert der Vreithofer zwelf wiener phenning vnd dient di an sand Mychelstag. Wir haben in auh gigeben di vorgenante gult mit sogetaner beschaidenhaid, daz si schulten jerichleich durch vnser sel vnd aller vnser vodern sel hail willen drei selmesse sprech an den nesten Mentag nah Ostern vber aht tag, an dem ainen tag oder darnah in drin, so ez in peste fuge. Vnd daz ditz gescheft stet vnd ewig beleib, so geben wir, ich vor genanter Herman van Wolfgersdorf vnd ich Agnes sein housvrow, den vorgenanten Herren van dem Heiligen Chreutz disen prief ze einem offen vrchund, versigelten mit vnserm iynsigel vnd auch mit meines vetern ynsigel‚ Herrn Hermans von Chranperch, der sein gezeug ist mit seinem ynsigel. Diser prief ist gegeben nach Christes gepurd vber dreutzehenhundert Iar, darnach in dem vier vnd dreizigistem Iar, an sand Jacobestag des zwelfpoten.

Source Fulltext: WEIS, Heiligenkreuz (=FRA II/16, 1859) S.162