Ich Leutold von Wildek Vergich vnd Tue chund allen den, die disen Prif lesent oder horent lesen, die nv lebent und hernach chunftich sint, Datz mein Vater ze rechtem selgeret im hat bestaet und gemacht hin ze dem Heiligen Chreutz Einen ewigen Jartag mit zehen phunden Wienner pheninge geltz purchrechtes, Vnd hat den Heren ze dem Heiligen Chreutz die gult oufgezaigt ouf zwayn Mulen, die gelegen sein ze Medlich, aine in dem Marcht vnd haist die Stampf Muel, die Mert, der Stecher inne hat, Vnd die ander ze naest dabei vor dem Marcht vnd haist die Schuler Muel, die Vlreich der Stecher inne hat, vnd daz mein Vater den Jartag mit den zehen phunden geltz auf den zwayn Muelen bestat, besand er die weisesten und pesten in dem Marcht ze Medlich und pat sev nach irm trewen, daz sev die zwo Muel mit sampt den vnbesazzen beschowten vnd schatzten, ob die zwo Muel die guld mochten getragen oder nicht. Vnd daz haben die Erbaren Leut getan Vnd haben darnach bei ir ayde vnd bei irn trewen gesagt, die ze der Zeit sint gewest, Daz die zwo Muel die gult mit aller not mochten gedienen, vnd daz sev nicht tewer wären, danne die zehen phunt geltz, die zv dem Jartag gehorent. Vnd darumbe daz man die gult dester Willichleichter vnd dester gerner von den Muelen ze den Jartag diente, gab mein Vater den zwain Muelen daz recht, waer daz daz die Erbern Leut, die dev zwo Muel inne hieten vnd ir Nachchomen den dienst von den Muelen dienten, so solten sev furbaz daz selb Jar ledig sein, vnd solten weder mit Losung noch mit stewer noch mit dhainenlei anlegunge fürbaz nieman mer gebunden sein ze warten noch ze dienen. Vnd die vorgeschriben Wandlung sag ich vorgenanter Leutolt vnd ich Ott der hafenloz bei vnser trewen, daz uns daz gar wol chunt vnd gewisen ist, daz die vorgenant Wandlung also ergangen vnd geschehen ist, alz von wort ze worte vorgeschriben stet; vnd dez sey wie payde der zwaie Muel, oder wer sev inne hat, gezeug, mit vnsern triwen zwen vnd mit unser payden Insigel. Der Prif ist geben ze Wienne nach Christez geburde Dreutzehen Hundert Iar, in dem Drev vnd viertzigesten Iare an sant Kathrain Tag.

Source Fulltext: WEIS, Heiligenkreuz (=FRA II/16, 1859) S. 188-189