Ich Michel von Wildek vnd Elspet mein Housvrowe vnd vnser paider erben Vergehen vnd tun chunt offenlich mit disem brief allen den, die in sehent, lesent oder horent lesen, die nu lebent vnd hernach chunftich sind, Daz wir mit wolbedachten mut vnd mit gesampter hant zu der zeit, do wir mit recht wol getun mochten, Recht vnd redlich verchoufft haben vnsers rechten ledigen vreyn aygens, Sehs phunt vnd dreizzig wienner phenning geltes gelegen auf behousten gut vnd auf vberlend in den Markt ze Dreschirchen vnd in den dörffern vnd pei den dörffern, die hernach gescriben stent. Von erst ze Dreschirchen sint gelegen auf behowstem gut Newn schilling vnd vierzenthalber wienner phenning geltes, Vnd der dient Lewbel Zochman in dem Winchel von ainem hof gelegen ze nachst dem Chöndlein ain halbes phunt, Peter pehem auf der Hochstrazz von ainem hof ain vnd achtzig phenning, Thoman pinter sein nachtpowr von seinem hof ain vnd achtzig phenning, vnd doselbes ze Dreschirchen sint gelegen auf vberlend zehen schilling sibenthalber vnd zwaintzig phenning geltes, vnd daz dient, die hernach geschriben stent, Vlreich pawr vor dem tor von ainem Powmgarten drey Schilling phenning Vnd am Glaubsichsen dient von erst Niclas der Choler von Tetendorf von ainer Setz Syben phenning, Christan churtz von Wintstorf von einer Setz drey phenning, Stephan peyrer von einer Setz sechs phenning‚ Die alt frantzing von Trebeswinckel von einer Setz Drey phenning, Chuntzel Frantz doselbes von ainer Setz drey phenning, Hainreich glawrer von Molestorf von ainer Setz drey phenning, Fridel nawsler, von ainer Setz Siben phenning, Jans nawsler, von ainer Setz Siben phenning, Niclas chleit von Gumpoltzchirchen von ainem acker doselbes vier vnd zwaintzig phenning, Thoman pinter von Dreschirchen von ainer Setz drey phenning, Haintzel peck von ainer Setz sechs phenning, Niclas vastzieher von ainer Setz fiumf phenning, Vlreich Zechmaister von ainer Setz fiumf phenning, Vlreich fritz von ainer Setz drey Helbling, Liendel chlainuogel von zwain Setzen aindlefthalben phenning, Stephan sullen winchel von ainer Setz drei phenning, Die rederlin von ainer Setz drewzehen phenning, Ortel ledrer von ainer Setz zwelif phenning. Die vorgenanten Setz vnd Weingarten sint alle gelegen auf dem Glaubsichsen. Darnach so dient Niclas der Chramer datz Dreschirchen von zwain ackern Sechs vnd zwaincig phenning, Ritschart von zwain aeckern zwen vnd dreizzig phenning, Vlreich trutzel von ainem achker zwaintzig phenning, Ortolf hantsneyder von zwain Jeuch aechkern newn phenning, Vlreich Zechmaister von ainem achker acht phenning, Chuntzel Pörtel von ainer wisen Sechzehen phenning. Die vorgenanten aechker sint alle gelegen zwischen Dreschirchen vnd Drumpnaw. Vnd ze Gundramstorf sint gelegen auf behawstem gut vnd auf vberlend zway phunt an Sechs wienner phenning geltes, vnd desselben dient Symon der Pawr von seinem hof doselbes ain halbes phunt phenning vnd daz vberlend dient, die hernach gescriben stent. Von erst Hainreich pei dem steg von ainem achker pei dem chrautgarten sechs phenning, Woekerl auf dem graben von ainem achker doselbes sechs phenning, Lewbel von Wienn von einem weingarten auf dem Stainueld Sechs phenning‚ Andre enthalb des pachs von ainem weingarten sechs phenning — Andre Maegerl von ainem weingarten zwelif phenning, Jans Maegerl von Minchendorf von ainem weingarten zwelif phenning. Der Pharrer von Waltersdorf von ainer Setz haizzet die Schoblinn, zwaintzig phenning, Symon Pawr ze Gund ramsdorf von ainer Setz zehen phenning, Der Posch von Drumpnaw von ainer Setz Sechs phenning. Die vorgenanten Setz vnd weingarten sint gelegen auf der Laimgrueb vnd pei der Laimgrueb. Darnach so dient der Düring von ainem viertail achker fiumf vnd viertzig phenning, Jans Chawnperger von ainem viertail achker fiumf vnd viertzig phenning, Die Putrinn von ainem viertail achker ze Drumpnaw fiumf vnd viertzig phenning. Paul auf dem Pach von ainem viertail achker fiumf vnd viertzig phenning, Dietel von Dietmarsdorf von ainem viertail achker fiumf vnd viertzig phenning, Haintzl von Dietmarsdorf von ainem viertail achker fiumf vnd viertzig phenning. Die vorgenanten viertail achker sint alle gelegen pei Dietmarsdorf. Vnd ze Entschesdorf sind gelegen auf behawsten gut vnd auf behawsten gut vnd auf vberlend drewzehen schilling phenning an drey helbling geltes. Vnd daz dient, die hernach geschriben stent. Von erst von dem behawsten gut Gimolf von seinem hof zwen vnd dreizzig phenning, Wölfel peck von seinem hof sechzehen phenning, Thoman padner von seinem hof zwainczig phenning, vnd doselbes von vberlend dient Michel Drewrichsfeld von ainem weingarten gelegen auf dem aygenlein zwelifthalben phenning, Heintzel Tennhendel von ainem weingarten doselbes zweliff halben phenning, fridel trawtwein von ainem weingarten doselbes zwelif phenning, Birek von ainem chrautgarten fiumf phenning, Chunrat reustel von der chrawtzsetz zwaintzig phenning, Die Ruebhaimerin von der chrawtzsetz vier phenning, Böltzel pinter von ainem flechk pei dem renftlein zwen phenning, Renftel von ainem weingarten, haizzet die schusterin, achthalben phenning, Weltzel pinter von ainem weingarten haizzet die Chienekerin, fiumfzehen phenning, Die Stainhauflinn von ainem weingarten doselbes fiumfzehen phenning, Der einuoltig Ulrich von ainem weingarten bei dem chrewtz fiumfzehen phenning. Darnach haben wir verchowft Sechzehen emmer weins rechter gibmass, Vnd die dient Jans auf der Hulben ze Entschesdorf von seinem haus vnd von ainem weingarten gelegen dopel; Vnd haben auch verchoufft zwen emmer weins Perchrechts gelegen zwischen Entschesdorf vnd Prunn, der dient Jensel vom Rein einen emmer vnd zwen phenning von einer Setz gelegen ze nachst hern Andre des Stadeker Capplan haus. Der Zechmaister ze prunn ainen emmer vnd drithalb phenning von ainer Setz gelegen doselbs pei hern andre des Cappelan haus. Darnach haben wir verchaufft fiumf Schilling wienner phenning geltes, die gelegen auf ainer Setz hinder dem vreydhof vnd die inne hat Woelfel der pechk. Wir haben auch verchauft acht vnd viertzig wienner phennig geltes, die gelegen sind auf wismad vnd auf aechkern zwischen Minchendorff vnd Logchssendorf, vnd daz gult dient, die hernach geschriben stent. Redel von Minchendorf acht phenning, Vlreich snaitler zwelif phenning, Chunrat snaitler vier phenning, Andre von Gutntzesdorf acht phennig, Chunrat grasmann acht phennig, Chunrat Mawrer acht phennig. Vnd auch darnach haben wir verchaufft achthalben emmer weins perchrecht der grozzen mass gelegen ob Gumpoltzchirchen vnder dem hochchogel vnd haizzet in dem Hornlein, vnd des dient Herll von seinem weingarten ain viertail, Ortel Dasser ain viertail, der Vngerl ain viertail, Der Sirmerl ain viertail, Thoman haymleins veter ainen halben emmer, Leubel Schaffer zwen emmer. Daz ander perchrecht doselbes leit nu ze stund vnsaftleich. Die vorgenanten gult vnd güter mit alle vnd darzue gehört ze veld vnd ze dorf, wie daz genant ist, vnd wo daz gelegen ist, mit allen den nutzen vnd rechten, als wir daz vnuersprochenleich in aigens gewer her pracht haben vnd die all vns gedient sind warden auf Sand Michels Tag, haben wir verchauft vnd geben vmb hundert vnd vmb sechs vnd zwainizig phunt wienner phenning, der wir gantz vnd gar gericht vnd gewert sein, den erbern geistleichen heren pruder Cholman, die zeit apt vnd dem Conuent daz dem heiligen chrawtz vnd allen irn Nachkomen furbas ledichleichen ze haben vnd allen irn frumen damit schaffen, versetzen, verchauffen vnd geben, wem si wellen an alle widerred. Vnd sein wir des ir recht gewer vnd scherm für alle ansprach, als aygens vnd des Landes recht ist in Osterreich. Gewunnen se awer fürbas daran mit recht icht chrieg oder ansprach, daz sullen wir in alles ausrichten an irn schaden vnd sullen Sie daz haben auf vns vnd auf allem vnserm gut, daz wir haben in dem Land ze Osterreich, oder wo wir daz haben, wir sein lebentig oder tod. Mit vrchund ditz brifes besigelt mit meim obgenants Michels Insigel, vnd der sach sind gezeug Alber vnd Eberhart mein prüder Vnd mein Swager Vlreich der Sebecher mit irn Insigel, In an schaden. Geben nach Christes gepurd drewtzehen hundert Iar darnach in dem Achtzisten iar‚ des Sunntages In der ersten Vastwochen.

Source Fulltext: WEIS, Heiligenkreuz (=FRA II/16, 1859) S. 337-340