Pileus miseracione diuina tituli sancte Braxedis Presbyter Cardinalis ad infra scripta apostolica auctoritate suffultus dilectis nobis in Christo Abbati et Conuentui Monasterii Sancte Crucis Ordinis Cisterciensis, Patauiensis diocesis, salutem in Domino. Justis petencium desideriis dignum est, nos facilem prebere assensum et vota, que a rationis tramite non discordant, effectu prosequentes complere. Vestris igitur in hac parte supplicacionibus grato concurrentes assensu, annexionem, vnionem et incorporacionem parochialis ecclesie Sancti Georgii in Aleht dicte diocesis, vobis et vestro Monasterio per felicis recordacionis olim Cardinalem Gwidonem, tunc Apostolice Sedis legatum, factas et per Reuerendum Patrem Episcopum Patauiensem, loci Ordinarium confirmatas, ratas habentes atque gratas, eas auctoritate apostolica, qua fungimur, tenore presencium confirmamus et presentis scripti patrocinio communimus. Nulli ergo hominum liceat hanc paginam nostre confirmacionis et communionis infringere, vel ei ausu temerario contraire. Si quis autem hoc attemptare presumpserit, indignacionem omnipotentis Dei et beatorum Petri et Pauli Apostolorum eius se nouerit incursurum. Datum Wienne, Patauiensis diocesis iij° Kalendas Martii‚ Pontificatus Sanctissimi in Christo Patris et domini nostri, Domini Vrbani, diuina prouidencia Pape Sexti, anno quarto.

Source Fulltext: WEIS, Heiligenkreuz (=FRA II/16, 1859) S. 348-349