Wir Wentzeslaus von gots gnaden abt, Niclas prior, Mauritius Subprior, Johannes kelner vnd Bursner, Benczeslaus phortner vnd der gantz Conuent des gotzhaws dacz Zedlicz, Vergehen fur vns vnd alle vnser nachkomen vnd tun chvnd mit dem brif offenbar allen Lewten, Das wir mit wollbedachtem müt vnd mit verainten Rat vnsers Conuents, do wir es rechtlich wol getun machten, Mit vnsers Weingarten perigmaysters hant Heinreichs des Flötzer, die zeit Statrichter ze newmbürg chlosterhalben vnd perigmaister auf hern Stephans des scheuchen chind gut doselbs verchawft haben ain virtayl weingarten, der zu vnserm gotzhaws gehört hat, gelegen an dem Mitter ekk ze nachst der Geistlichen Herren weingarten von dem Heiligen chrewz, do man alle iar von dint herrn Stephans des Scheichen kind ainen halben Emmer weins ze perkchrecht vnd drey helbling ze voytrecht vnd nicht mer, den egenanten vnsern weingarten, der zu vnserm gotzhaus gehört hat, Haben wir verchawft vnd geben vmb drewtzehen phvnt wienner phenninge, der wir an vnsers gotzhaws stat gantz vnd gar verricht vnd gewert sein ze Rechten tagen, dem erwürdigen herren Abt Niclasen vnd dem gantzen Conuent des gotshaws zu dem heyligen Chrewtz fürbas ledichlich vnd vreyleich ze haben, allen irn frvmmen damit schaffen, als in das allerpest vnd irm gotzhaus fůgent ist; Vnd sein auch wir Bentzeslaus, Abbt datz Zedlitz, vnd gemainichlich der gantze Conuent doselbs des egenanten virtayl weingarten des erwürdigen herren Abbt Niclas vnd des gantzen Conuents des gotzhaws zu dem Heiligen chrewtz recht gewer vnd scherm für alle ansprach nach des Lanndes recht in Österreich. Vnd was in mit recht daran abget, das schullen sew haben auf vns vnd vnuerschaidenlich vnd auf allem dem gut, daz vnser gotzhaws hat, wir sein lebentig oder tod. Vnd des ze vrchünd der vorgeschribenn handlung geben wir Abt Bentzeslaus des gotzhaws zu Zedlitz für vns vnd alle vnser Nachkome dem erwürdigen herren Abt Niclasen zu dem Heyligen chrewtz vnd dem gantzen Conuent daselbs den brief darüber versigelten Mit vnserm vnd vnsers Conuentzs anhangunden Insigeln Vnd mit vnsers egenanten weingarten perichmaysters Insigel, Hainreichs des Flozzer, den wir darvmb vleizzig gepeten haben an vnser vnd vnserr nachkomen stat. Der brief ist geben nach Christi gepürd drewtzehen hundert iar darnach in dem drew vnd Newntzigistem Iar, acht tag nach Sand Michels Tag.

Source Fulltext: WEIS, Heiligenkreuz (=FRA II/16, 1859) S. 385-386