Ich Eberhart von Cappell vergich für mich vnd für all mein erben vnd tun kund allen den, die den brief lesent oder horent lesen, die nu lebent vnd hernach künftig sind, Vmb die achtzig wienner phenning gelts, gelegen ze Erdprust auf einem halben lehen vnd auf alle dem, das dartzu gehöret ze ueld vnd ze dorff, wie das genant ist, die der Erwirdig geistleich herr Bruder Niclas, Abt datz dem heiligen chrewtz vnd der Conuent daselbs von Paulen dem Garser chawfft habent, der die von mir ze lehen gehabt hat, das ich mit gutem willen, mit wolbedachtem müt vnd nach rat meiner frewnt, lauterleich durch got vnd durch meiner vnd aller meiner vodern selen hails willen die aigenschaft des vorgenanten guts den egenanten geistleichen herren datz dem heiligen Chrewtz gebe vnd si der Manschaft ledig lassen hab, also das si vnd all ir Nachkomen sullen furbas dasselb gult vnd gut vnd swas dartzu gehoret in rechts freis aigens gwer ledichleichen vnd freileichen haben, vnd allen iren frumen damit schaffen, als es in vnd iren gotzhaws nuczleichen vnd fügleichen sei als aigens vnd des lannts ze Österreich recht ist. Vnd han auch ich mich desselben gults vnd guter vertzigen vnd furzicht getan vnd vertzeich auch mich des Rechtt vnd redleich mit dem brief also, das ich, noch all mein erben fürbas darauf weder vmb lehenschafft noch vmb chainerlai ander sach, wie die genant ist, nymermer chain ansprach, noch vodrung haben, noch gewinnen, noch chains rechtens darauf iehen sullen in dhain weg. Vnd darüber so gib ich für mich vnd für all mein erben In den brief ze einem waren vrchund der sach, versigilten mit meinem anhangunden Insigil. Der geben ist ze Wienn Nach Kristi geburd Drewtzehenhundert Iar darnach in dem Siben vnd Newntzgistem Iar, des nechsten Mentags vor sand Anthony tag.

Source Fulltext: WEIS, Heiligenkreuz (=FRA II/16, 1859) S. 392