Nos Andreas, Dei et apostolice sedis gracia episcopus Victricensis et cooperator in pontificalibus reverendi in Christo patris ac domini domini Georii episcopi Pataviensis, ad perpetuam rei memoriam.||
Cordi nobis est, divinum cultum, quantum nobis ab alto conceditur, nostris temporibus adaugere. In hoc enim dominice passionis recolitur memoria: Christus ipse sumitur et pro vivorum ac mortuorum salute ymolatur hostia salutaris. Cum itaque nos anno Domini millesimo quadringentesimo duodecimo consecravimus cappellam in Meyrling in honore sancti Laurencii levite ac martiris dominica proxima¹ post festum beati Jacobi maioris, et post consecracionem eius statim nobis ac domino Alberto, tunc temporis abbaciam in monasterio Sancte Crucis regentem (!), fundator predicte cappelle ad manus nostras predicto monasterio humiliter et devote cum omnibus suis iuribus et proventibus ad eam pertinentibus sinceriter resignavit, et ut christifideles divinum cultum in eadem cappella eo ferventius visitent et illuc confluant, nos omnibus vere penitentibus et confessis, qui dictam cappellam in anniversario eiusdem dedicacionis, in festivitatibus nativitatis, circumcisionis, epiphanie Domini et per octavas, resurreccionis, ascensionis, penthecostes, corporis Christi et per octavas, gloriosissime virginis Marie, beatorum apostolorum, omnium sanctorum et in commemoracionem omnium animarum et presertim in patrociniis predicte cappelle devote visitaverint et ad luminaria et fabricam ipsius cappelle suas manus porrexerint adiutricis (!), de omnipotentis Dei misericordia et beatorum Petri et Pauli apostolorum eius confisi suffragiis quadraginta dies indulgencie de iniunctis sibi penitenciis misericorditer in Domino relaxamus.||
Harum sub appensione nostri sigilli testimonio litterarum. ||
Datum anno, die et loco prenotatis.