Frater Johannes abbas Cistercii . . . Venerabili et in Christo nobis carissimo domino Michaeli coabbati nostro monasterii Sanctae Crucis in Austria salutem et animarum securitati consulere. Cum superioribus annis commissio visitationis et reformationis super monasteriis in pluribus provinciis nostra et Capituli Generalis auctoritate fuerit demandata et in ejus commissionis conscriptione non fuerit apposita clausula potestatis rehabilitandi aliquas personas Ordinis nostri, nos integrum zelum vestrum ad ea, quae Dei et Ordinis sunt, nec non prudentiam et diligentiam vestram considerantes et universas Ordinis personas honestare quantum possumus desiderantes tenore praesentium nostra et Capituli Generalis ac totius Ordinis auctoritate qua fungimur, quaque vos in sequentibus fungi volumus, vobis tenore praesentium damus auctoritatem et potestatem rehabilitandi viginti personas et infra Ordinis nostri utriusque sexus in limitibus in eadem commissione ultimo vobis destinata et pro tempore durationis dictas commissionis ad omnes Ordinis dignitates, officia, actus et administrationes in spiritualibus et temporalibus, desuperque prout districtio vestra decreverit, litteras sufficientes et validas expediendi. Datum in monasterio nostro Cistercii sub appensione sigilli nostri die sextadecima mensis Januarii anno Domini millesimo quingentesimo, more gallicano.

Source Fulltext: Zisterzienser-Chronik 12 (1900) S. 183-184