Ich Seyts von Chunnring von Seueld, vergich für mich vnd für alle mein erben vnd tun chunt offenleich mit dem brief allen den, die in lesent oder hornt lesen, die nv lebent vnd hernach chunftich sint, Vmb allen den zehenten, den Nichlas der Dratlauf, purger ze Wienne, von mir ze lehen gehabt hat, der gelegen ist ze Sweinwart, grozzen vnd chlainen, ze ueld vnd ze dorf, gestifft vnd vngestifft, versucht vnd vnuersucht, wieso der genant ist, der mein lehen ist gewesen, von dem edeln heren Graf Friedreichen, dem Purchgrafen von Nurnberg, vnd denselben zehenten der vorgenant Nichlas der Drotlauf den erbern geistleichen vrown, der Abtessinn vnd dem Conuent gemain datz sant Nichlas ze Wienne ze chouffen gegeben hat, daz ich mit gutem willen, mit wolbedachtem mut, zu der zeit, da ich es wol getun mochte, denselben geistleichen vrown gemaine vnd allen iren Nachkomen lautterleich durch Got vnd durch hails willen meiner vnd aller meiner vodern seln in vnd irem chloster ze stewr vnd ze hilffe ledichleich gegeben han mein Manschaft vnd alle die recht, so ich an dem vorgenanten zehenten gehabt han, also, daz si denselben zehenten furbas ledichleich vnd freileich haben, niezzen vnd allen irn frumen damit schaffen sullen, wie in vnd irm chloster das wol chumt vnd fueglich ist, vnd han ouch mich des vorgenanten zehents, vnd aller der rechten, so ich daran gehabt han, vertzigen vnd gentzleich furzicht getan, daz ich noch mein erben furbas darouf nimmermer chain ansprach, recht noch vodrung haben, noch gewinnen sullen in dhainen wegen. Vnd ouch also mit ausgenomener rede ist, daz die egenanten geistleichen vrown die aygenschaft des obgenanten zehents auspringent von dem vorgenanten meinem herren, dem Purchgrafen von Nürnberg, von dem heutigen tage inner iars frist. So sol die gab, die ich in daran getan hab, als vorgeschriben stet, gentzleich stet vnd vntzebrochen beleiben. Wer aber daz si das in derselben zeit nicht auspræchten, so sol die vorgeschriben mein gab ab sein, vnd sol ich alle meine recht an dem vorgenanten zehent haben recht, als ich sie daran gehabt han, an allen chrieg, vnd daruber so gib ich in den brief zu einem warn vrchund der sach, versigilten mit meinem insigil vnd mit meins swagers insigil, hern Haydenreichs von Meissow obrister Schenken vnd zu den zeiten Lantmarschalich in Osterreich vnd mit meins Ohems insigil, hern Albers von Ottenstain, die der sach gezeug sint mit irn insigiln. Der brief ist geben ze Wienne nach Christs gepurd Dreutzehenhundert iare, darnach in dem sibentzgistem iare an vnsers herren Gotes Leichnamen.

Source Fulltext: WEIS, Heiligenkreuz (=FRA II/16, 1859) S. 414-415