Urbanus episcopus seruus seruorum dei. Dilectis filiis Canonicis sancti Georgii. Salutem et apostolicam benedietionem, Suscepta iam pridem a felicis memorie. pp. Lucio predecessore nostro querela dilecti filii nostri Magistri R. canonici Patauiensis. quod uos decimam ad ecclesiam beati Martini Treimensem pertinentem. ius etiam parrochiale. quod habere solebat conuentus et oblationes que in festo beati Martini offerri consueuerunt occasione noue ecclesie. quam infra ipsius terminos construxistis. et feceratis beati Martini nomine dedicari. irrationabiliter abstulistis. Causam ipsam dilectis filiis nostris sancte Crucis et sancti Petri Salzburgensi abbatibus et preposito Nunguenburch fine commisit canonico terminandam. Verum abbate sancti Petri interesse questionis examini non ualente. alii duo partibus conuocatis audierunt que fuerunt hinc inde proposita. et cum ad sententiam uellent procedere. quibusdam emergentibus causis finem litigium non accepit. propter quod tam predictus R. quam prepositus ecclesie uestre ad iam dicti predecessoris nostri presentiam accesserunt Cumque apud ipsum aliquandiu litigassent. nec sub ipsius examine potuisset controuersia terminari. idem predecessor noster causam ipsam dilectis filiis nostris Abbati de Windeberg. et h. maioris ecclesie Ratisponensis et v. de Spalato prepositis de assensu partium delegauit. sed commissio ipsa sicut accepimus ad iudicium non peruenit. Ideoque presentium uobis auctoritate precipiendo mandamus. quatinus cum propter hoc fueritis requisiti in loco in quo predictus R. per alicuius potentiam non grauetur. ad eorum presentiam accedatis. Et quod iuxta formam commissionis decreuerint suscipiatis firmiter et seruetis. Et quia pendente lite eidem R. quandam decimam abstulistis ipso apud sedem apostolicam existente quod graue tulimus et molestum nichilominus presentium auctoritate mandamus. ut si res ita se habet. ei decimam ipsam restituere non tardetis. Deinde si in ea credideritis uos aliquid iuris habere. Sub eisdem iudicibus quod iustitia dictauerit exequamini. Datum Verone XII. Kal. Aprilis.

Source Fulltext: BIELSKY, Sanct Georgen (=AÖG 9, Wien 1853) S. 267, Nr. 14