Theodoricus Dei gracia Episcopus Olomucensis Ecclesie. Uniuersis Christi fidelibus presentes literas inspecturis Salutem in Domino sempiternam. Quoniam nichil viriditatis habet ramus boni operis nisi in radice manserit caritatis et quidquid praecipitur in fundamento caritatis virtutum precipue solidatur, omnes autem, ut ait Apostolus, stabimus ante tribunal Christi reddituri rationem de omnibus que in corpore gessimus, sive bona fuerint sive mala, oportet nos diem messionis extreme misericordie operibus prevenire, et ea seminare in terris, que postmodum cum multiplicato fructu recolligere auxiliante Domino valeamus in coelis, uniuersitatis uestre deuocionem in caritate, que operit multitudinem peccatorum, monemus et hortamur in Domino flagitantes, quatenus attendentes defectus Ecclesie sancti Georii Martiris in Hertzogenburga, Patauiensis Dyocesis, de bonis vobis a Deo collatis, pias elemosynas et grata caritatis subsidia dignemini eidem Ecclesie misericorditer erogare. Et nos de omnipotentis Dei misericordia et beatorum Petri et Pauli Apostolorum eius Sanctique Georii martiris confisi patrocinio, omnibus vere penitentibus, contricione previa et confessis, qui eandem Ecclesiam in Hertzogenburga frequentare curaverint, vel suas inibi reliquerint elemosynas, et sermones ac divina curaverint audire efficaciter in festivitatibus Domini et gloriose matris ipsius semper Virginis, in diebus Patronorum et dedicacionis eiusdem Ecclesie, manumque ei porrexerint adiutricem precedente Dyocesani consensu Episcopi XL dies iniuncte eius penitencie in Domino misericorditer relaxamus, presentibus perpetuo valituris. Datum Brune Anno Domini M°. CC°. LXXXVI. XVI. Kal. Aprilis indictione XIIII.

Source Fulltext: FAIGL, Herzogenburg (Wien 1886) S. 12-13