Ich Dietreich Puehperger von Basserberch. vnd ich Wulfing. vnd ich Olber. zwen prueder von Puehperch. wir vergehen vnd tuen chunt allen den div disen prief ansehent. oder lesen horent, div nv lebent vnd her nah chvnftig sind. Daz wir mit vnser gueten vreunt rat. vnd aller vnser erben guetleichem willen. vnsers vreis aygens. Sehs vnd dreizich Jeuch akchers, datz potenprunn. daz Fridreich der Horlanter von vns zelesen (sic) hat gehapt. do man im von gedient hat. an sand Margreten tag zwen vnd fierzig phenning new^er wienner. vnd an dem sunntag vor sand Michels tag, ainen Metzen vnd zwainzich Metzen Baitz poltingner mazze, auf gehauft, vnd auf iegleihen Metzen Baitz ainen wienner phenning vnd sehs vnd ain halphunt phenning wienner munzz an dem selben tag. vnd ze vahang (sic) ains vnd zwainzich hu^en. durch aller vnser vodern sel willen. vnd auch vnsers selbs hail gegeben haben. dem Gotshaus des gueten sand Georgn datz herzogenbu^erch vnd aller der samnung des selben Gotshaus ze ainem rehten aygen. als wir vnd vnser vodern daz selb aygen her praht haben, vnd haben auh in gelobt, daz vorgenant aygen ze scherm. wo in des no^et geschieht als reht ist in Osterreich. gieng wir in des scherms ab. des ob got wil niht geschieht. wietanne schaden sev des nemen. an dem aygen. vnd an der chost. den schull wir in abtuen, vnd schullen sev das haben auf alle dev wir haben in Osterreich. Daz div red stet vnd vnuerchert beleib geb wir dem Gotshaus vnd der Samnung disen prief versigelten mit vnsern drin Insigeln zv ainer rehten vrchund vnd ze ganzer stetichait. Des sint zeug her Chunrat von Arnstain her Chunrat Tiernstainer her Gundacher von Retelnperg her Ott von Beizzenberch. her Alber von Gozesdorf her wernhart von Nuzdorf Olram von der linden. Leupolt Smitsperger vnd ander erber leut genuech. Diser prief ist geben do von Christes puerd warn ergangen Tausent Jar drev hundert iar dor nah in dem Ohcehenten iar des nasten Sunntages nah dem Perhtag.

Source Fulltext: FAIGL, Herzogenburg (Wien 1886) S. 62-63