Ich Hainreich der votendorfer vergich an disem prief vnd tuen chund allen den dev in lesent oder hornt lesen dev nu lewent oder hernach chvnftich sind, daz ich mit meiner Hausvrowen vron Osannen gueten willen vnd mit gunst aller meiner vreunt vnd aller meiner erben zter zeit do ich iz wol getuen macht gegeben han den hof der do haizzet datz dem nidern zehent hof der mein rechtz aigen gebesen ist dovon man dient zehen schilling phenning gemainer wienner munzz an sand mychels tag vnd zwelif ches rechter rabenstainer vier ze wainachten vier ze Ostern vier ze phingsten vnd zwo gemast gens vnd schechs huerr durch aller meiner vodern sei willen vnd auch vmb mein selbs hail dem gotshaus des gueten herren sand Jorgen ze Hertzogenburch vnd auch alle der samnung des selben gotshaus mit alle dem recht vnd nutz vnd iz mein vodern vnd ich selben iz her pracht habent iz sei gestift oder vngestift versuecht oder vnversuecht ze veld vnd ze dorf ledichleich vnd vnverchummert vnd pin auch ich der vorgenant Hainreich der v^otendorf des egenanten guets des gotshaus vnd der samnung des selben gotshaus scherm vnd gewer fuer all ansproch als aigens recht ist indem lande ze Osterreich vnd ze pezzerr sicherhait setz ich vorgenanter Hainreich der v^otendorfer dem offt genanten gotshaus vnd der samnung des selben gotshaus Albern mein prueder den v^otendorfer vnd Wolfharten den ziervogel mit ir paider insigel ze scherm vnd ze gewer als mich selben wer auer daz daz wir in des scherms von chainerlai sach abgiengen des ob got wil nicht geschiet wietan schaden sev des nemen an chost oder an mue dev si muesten haben vmb daz guet den schull wier in ablegen an allev wider red vnd an allen chrieg vnd daz in dem gotshaus vnd der samnung ze Hertzogenburch disev red stet gantz vnd vnzebrochen beleib Dor vber gib ich vorgenanter Hainreich der v^otendorfer dem egenanten gotshaus vnd der samnung ze Hertzogenburch disen prief versigelten vnd bestetten mit meinem Insigel vnd mit Albers Insigel ineins prueder des v^otendorfer vnd mit Wolfharts Insigel des ziervogels fuer alle ansproch vnd sind des gezeuch Her Chunrat von Tyernstain Her Hainreich von pappenhaim Her Gundacher von retelnberg Her Ott von weizzenberch Her wernhart von Nuzdorf Her Chunrat sein sun Her leb von vreuntzhausen vnd anderr pidiber leut genug den dev red vnd dev sach wol chund vnd gewizzen ist. Der prief ist gegeben do von Christes gepurd warn ergangen Tausent lar drevhundert iar dar nach in dem vier vnd zwaintzkistem iar an sand stephans tag datz Hertzogenburch in dem Gotshaus.

Source Fulltext: FAIGL, Herzogenburg (Wien 1886) S. 87-88