Ich Alber von Veltz vnd Ich Diemuet sein Hausvrowe vergehen vnd tuen chvnt an disem prief allen den die in an sechent. lesent oder ho^erent lesen. die nu lebent vnd her noch chunftig sint. Daz wir mit verdachtem muet vnd gesamter hant ze der zeit do wier iz wol getuen machten, mit vnser pesten vreunt rot. vnd mit guetem willen vnd gunst aller vnser erben haben gegeben ledichleichen vnd gentzleichen dem gotshavs vnd der Sampnung des gueten Herren sand Georgen ze Hertzogenbu^erch auf die Oblay. durch vnser sel vnd aller vnser vadern sel willen vnsers rechten vnd vreien aigens daz wier gehabt haben datz Cholochsdarf vier phvnt phenning geltes vnd sechs vnd dreizk phenning wienner gemainer muniz die man dient an sand Georgen tag. gestift vnd vngestift versuecht vnd vnversuecht. ze veld vnd ze darff. van anderthalbem lechen. vnd von sechs hofsteten vnd von Vberlent mit gantzer aigenschaft. vnd mit allem dem nutz vnd reth vnd wier sev in aigens gewer her procht haben, allen ieren frum damit ze schaffen als mit anderm ierem aigen an allen iersal. vnd schol auch Ich var genanter Alber von Veltz vnd Ich Diemuet sein Hausvrowe vnd vnser paider erben vuerbaz dhainer Vogtay auf dem var genanten guet gechen swer auer in dar zve gevelt den mvgen si wol dar vber ze ainem Vogt genemmen. vnd auch durch pesser sicherhait setzen wier vns Ich Alb er veltz vnd Ich Diemuet sein hausvrowe mit vnser paider erben vber die var genanten gult dem gotshaus vnd der sampnung des gueten Herren sand Georgen ze Hertzogenburch ze rechtem scherm vnd gewer vuer all ansprach als aigens recht ist vnd landes reht in O^estereich. wer auer daz sev an dem var genanten guet mit recht dhainen schaden nemen. den selben schaden schulle wier in ab legen an alle wider red. tet wir des nicht. swer dann zve den zeiten des landes Herre ist in dem land ze Ostereich. der schol dann mit vnserm guetleichem willen vnsers guetz swo wier iz haben in dem land ze Osterreich der vargenanten sampnung in gantburten. vnd schullen sev daz selb guet so lang inn haben vntzen daz wier in allez daz gelaisten daz wier in var verschriben haben an disem prief. vnd daz dev red stet vnd vnzebrochen beleib. dar vber geb wier in Ich Alber von Veltz vnd Ich Diemuet sein Hausvrowe disen prief ze ainem offen v^erchvnt vnd ze ainem waren gezeug diser sach. versigelt mit vnsern Insigeln vnd mit hern Wernharts insigel von Nuzdorf vnd mit meines pruder insigel Nyclas von Veltz vnd mit Go^etfritz insigel von Ayno^ed. die diser sach gezevg sind mit ieren insigeln vnd ander vrum levt genuech. den disev sach wol chvnd ist. Der prief ist gegeben ze Hertzogenbu^erch in dem chlaster. do von Christes gepu^erd waren ergangen drevzechen hvndert iar. in dem drev vnd dreizkisten iar dar nach an dem Aufert tag.

Source Fulltext: FAIGL, Herzogenburg (Wien 1886) S. 128-129