Ich Hainreich der Chutner purger zv Rettz vnd ich Agnes sein Hausvraw vnd all vnser erben veriehen offenbar vnd tuen chunt an diesem prief allen den di in sechen. lesen oder hoeren lesen di nv lebn vnd her nach chumftich sind. daz wier ain lechen haben von dem conuent datz Hertzogenburch vnd geho^ert in di Oblay. daz leit datz tzelderndorf. da habn wir ennher all iar von gedient an sand Georgen tag sechs schilling vnd sechs phennig wienner Mu^ennz. vnd an sand Gilgen tag tzwen vnd tzwainczich mettzen waittz vnd vier vnd tzwainczich metzen Gersten, vnd dreizich mettzen habern, allez eggenburger mozz. nv habn vns di Chorherren den dienst durch pet willen geringet vnd verwandelt. Also daz wir in furbaz ebichleich von dem vorgenanten lechen dienen schullen. oder swer iz inne hat alle iar an sand Georgen tag tzechen schilling phennig vnd an sand Michels tag tzechen schilling phennig. allez wienner, hintz salapulka in iern Hof. vnd wer aber daz daz vns ehaft no^et irr icht. so schulln wir den vorgenanten dienst der auf die tzwen taeg geschriben ist. dar nach in ocht tagen raichn gen salapulka als vor geschriben ist wir oder swer daz lechen zv den tzeiten inne hat. vnd ob wir in den vor genanten dienst zv den vorgenanten taegen nicht endienten, so schol dem Gotshaus vnd den herren daz vorgenant lechen ledich werdn vnd sein, als wir vnd vnser erben tod sein. vnd schulln sich auch zv allem irem alten recht vnd dienst habn als daz lechen vor gedient hat. vnd allen iren frum damit schaffen, an allen irresal. Daz disew wandlung staet vnd vnzebrochen beleib dar vber gib ich der vorgenant Hainreich der chutner vnd ich Agnes sein hausvrawe vnd vnser erben dem vorgenanten Gotzhaus vnd dem conuent sand Georgen datz Hertzogenburch disen prief zv ainem offenn vrchund vnd ainer ebigen staetichait versigelt mit vnsers genedigen herren Graf Otten insigel von Maydpurch wenn wir aigens insigels nicht enhaben. Des sind gezeug leutold von Ayno^ed vnd Gotfrid sein prueder vnd leupolt der smitsperger vnd Gabriel der Richter zv Rettz. vnd ecchart vnd danquart der chafman. Der prief ist geben nach Christes gepurd vber drevzechn hundert iar dar nach in dem tzway vnd vierczkistem iar an sand iohannes tag z v svnebenten.

Source Fulltext: FAIGL, Herzogenburg (Wien 1886) S. 163-164