WIR Graf Chuenrat von Schawenberch veriehen vnd tu^en chunt allen den die disen brief lesent oder ho^erent lesen. die nv lebent vnd hernach chunftich sind. Daz wir angesehen den grossen gepresten. den die Pharrleute ze Pharrchirchen. vnd alle die. die dar zv geho^erent gehabt habent von dem grossen gewalt Gotes verhengnuzze. daz daz Wasser von der Tuenawe die Pharchirhen da selbens hin geprochen hat. daz si dehain Gotes dienst. noch dehain Begrebnuzze da gehabt habent. Vnd haben lauterleichen durch Got vnd durch aller vnser vordern vnd nachchomen seien willen vnd auch durch vnser selber sel Hail willen den Erbern Gaestlichen Herren Probst Seyfriden ze Hertzogenburch vnd dem Conuent gemain dez selben Gotshauses vnd allen irn nachchomen vnd den Pharrleuten gemaine ze Pharrkirhen vnd allen den die dar zv gepharret sind. Recht vnd redleich gegeben vnsers rechten Aigens. die Aigenschaft der Stat hinder V^elreichs Hof des Grevls ze Stolhouen daz si ein andrev Pharrchirhen dar legen vnd pawen. Also daz wir noch alle vnser Erben auf die selben Chirhen ze Stolhouen noch auf den Grunt da die selb Chirhe auf gelegt wirt furbaz Ewichleichen nimmermer Chains rechten geiehen suln weder mit Lehenschaft noch mit Vogtay noch mit Chainerlay sachen denne daz die selb Pharrchirhe ze Stolhouen Ewichleichen verlehent sol sein von dem Gotshaus ze Hertzogenburg. vnd auch gevogt sol sein von vnserm Herren dem Hertzogen in O^esterreich in allem dem Recht, alz dev Chirhen ze Pharrchirhen von alter her gewesen ist. Vnd auch also daz der Pharrer swer Pharrer der Chirhen ze Stolhouen ist oder wirt. vns vnd allen vnsern vordern vnd nachchomen. sol furbaz Ewichleichen alle iar an sand Philips vnd sand lacobs tag in der oft genanten Chirhen ze Stolhouen Einen lartag begen mit Vigilii vnd mit Selmessen. vnd mit anderm gebet vnd Gotsdienst daz dar zv gehoret an allen vnderlazze. Vnd daz disev Gots gab vnd ditz Selgeraet furbaz Ewichleichen also staet vnd vnzerbrochen beleibe. dar vmb so geben wir Graf Chùnrat von Schawenberch. dem Conuent gemain ze Hertzogenburch vnd allen irn nachchomen vnd auch den Pharrleuten gemaine ze Pharrchirchen vnd ze Stolhouen vnd allen den die dar zv geho^erent. disen brief zv einem warn sichtigen vrchunde vnd zv einer ewigen Vestenung versigilt mit vnserm Insigil. vnd mit vnsers O^eheims Insigil. Stephans von Meyssawe Obrister marschalich in O^esterreich, vnd mit vnsers Swager Insigil hern Leutoldes von Chunringe die diser sach gezeuge sind mit irn Insigiln. Diser brief ist geben ze Wienne nach Christes gebu^erde Dreuzehen hundert lar dar nach in dem Drev vnd Viertzgisten iar an sand Cholmans tag.

Source Fulltext: FAIGL, Herzogenburg (Wien 1886) S. 167-168