ICH Goerig der Utz purger zu Newnburg chlosterhalben vnd ich Agnes sein hausfraw vnd ich michel der chastner, des deutschen ordens, vnd ich hainreich der Alber auch purger zu Newnburg chlosterhalben vnd ich Kathrei sein hausfraw vnd vnser aller erben wir veriehen vnd tun chunt mit dem prief allen leuten di in sehent oder ho^erent lesen di nu lebent oder hernoch chu^enftig sint. Daz wir . . . mit vnsers pergmaisters hant dez erbern mans Albrechts von pirpaum di zeit pergmaister vnser vrawn gotshaus zu Newnburg chlosterhalben mit rechter fu^erczicht verchauft habn vnsern weingarten dez Sechsthalb Rachen ist leit im weingraben zu nachst den weingarten genant das phendel den ich egenanter Io^erig der Utz zu leibgeding inn solt haben gehabt vncz an mein tod. ledig vnd vnuerchummert vnd noch meim tod so wa^er der weingarten geerbt vnd geuallen auf den egenanten micheln den chastner den deutschen herrn vnd auf sein mu^emen di egenante frawn Kathrein di Alberin wann in di erbschaft zu chrieg tet Simon der grosmugler vnd sein miterben vnd daz triben paid tail alz verr daz paid tail cho^emen gen hof fu^er die herschaft do hinder giengen paid tail aller ir chrieg vnd ansprach von der erbschaft wegen dez obgenanten weingarten ob ward von den hern zu dem rechten gesprochen Der obgenant Simon der grosmugler vnd sein miterben heten chain recht an dem egenanten weingarten Es solt michel der chastner vnd fraw Kathrei di Alberin pei der erbschaft peleiben vnd solten mit sampt dem Utzen den egenanten weingarten verchauffen wann si di nachsten wa^eren di den weingarten solten erben noch dez Utzen tod alz daz von in peweist ist von der herschaft vnd dar vmb si der herschaft prief haben genomen do man alle jar von dem egenanten weingarten dient vnser vrawn gotshaus zwen emmer vnd anderthalb stauf weins zu perchrecht vnd zwen wienner phennig zu voytrecht zu drin etaiding im jar vnd alz es mit alter her chomen ist vnd nicht mer. Den egenanten weingarten habn wir egenante alle recht vnd redleich mit rechter fu^erczicht verchauft vnd geben vmb hundert phunt vnd vmb acht phunt alles wienner phennig der wir gar vnd gancz verricht vnd gewert sein zu rechten ta^egen yeder tail seins tails dem Erwirdigen hern Probst Jacobn dez gotshaus sant Ioergen zu herczogenburg den er vmb sein aignhaft wol versparcz gu^et gechauft hat fu^erbas ledichleich vnd vreyleich zu habn alln sein frumen do mit zu schaffen verchauffen verseczzen vnd geben wem Er welle an alln irsal alz im daz aller pest fu^egunt ist vnd ob er den weingarten versparen mag vncz an sein tod so hat er in geschaft noch seim tod in der chorhern Oblay do selbs zu herczogenburg allen iren frumen do mit zu schaffen alz ez ir Oblay aller pest fu^egunt ist vnd schulln dar vmb seiner sel gedenkchen vnd got fu^er in pitten. Auch ist zu merchken daz wir egenante alle vnd vnser aller erben habn in geben dem egenanten Erwirdigen herrn Probst Jacobn zu herczogenburg vnd noch seim tod der chorhern Oblay do selbs fu^enf gancz versigelt prief der ain ist ain spruch prief der sagt daz dez egenanten weingarten drithalb Rahen geuallen sey frawn gedrauten dez hu^ernein tachter di dez egenanten Utzen hausfraw ist gewesen der ander ist ain tail prief der sagt daz ich lo^erig der Utz mit meim sun Niclasen getailt hab vnd im der obgenant weingarten aller geuallen sey mit rechten los der drit ist der stat prief der sagt daz man der egenanten frawn gedrauten der Utzin gescheft in dem Rat zu Newnburg peweist vnd pestaett hab der vird ist dez märschalchs prief der sagt daz der egenant pergmaister v^ober den weingarten versigeln schull wann si vor dem marschalch di obgenanten drew hern michel der ch astner vnd Io^erig der Utz vnd Kathrei di Alberin peweist haben daz si rechtleich den selben weingarten erben der fu^enft ist auch dez marschalch prief der sagt daz di hern zu dem rechten erfunden haben daz Simon der grosmugler vnd sein mit erben an dem egenanten weingarten chain recht haben di egenanten drew schullen in erben. Ob daz wa^er daz si icht chrieg oder ansprach gewunnen an dem egenanten vnserm weingarten oder ob in mit recht icht dar an abgieng von wem daz waer mit recht so schulln si vns oder vnsern erben di egenanten fu^enf prief wider in geben gancz vnd vnczeprochen mit sampt dem chauf prief do mit sey wir ir recht gwer vnd scherm fu^er alle ansprach alz dez Landes recht ist in O^esterreich war aber daz di prief verlaren oder zu prochen wu^erden so sey wir vnd vnser pergmaister wer der ist di zeit dez scherm vnengolten. . . . Vnd daz der chauf vnd der scherm fu^erbas also sta^et gancz vnd vnczeprochen peleib so gebn wir paid ich Io^erig der Utz vnd ich hainreich der Alber in den prief versigelt mit vnsern aign Insigeln vnd mit vnsers egenanten pergmaisters Insigel vnd ich michel der chastner nicht aign Insigel han so han ich gepeten den erbern Seyfride den stechken den statschreiber zu Newnburg daz er mit sampt dem pergmaister der sach zeug sey mit seim Insigel an meiner stat. Dar zu^e hab wir gepeten di zwen erber mann Niclasen von Mu^eczesperg vnd fridreichen den Keydinger di zeit paid des Rats der stat zu Newnburg wann wir egenante alle si all dar vmb gepeten haben daz si der sach zeug sein mit iren Insigeln an vnser aller stat vnd an aller vnser erben stat. Der prief ist geben zu Newnburg noch christi gepurd drewczehen hundert jar dar noch in dem fu^enf vnd achczigistem jar an sant gedrauten abent in der vasten.

Source Fulltext: FAIGL, Herzogenburg (Wien 1886) S. 315-317