ICH Hanns Winkchler burger zu Klosternewnburgk Bekenn für mich vnd all mein eriben Vnd tun kund mit dem Offen brief allen den er fu^erkumbt von aller der zwitrecht vordrung vnd zuspru^ech wegen So ich zu dem Erwirdigen Geistlichen herren hern Iohannsen Brobst zu Herczogenburg seinem Capitl vnd Goczhaus zu Herczognburig daselben gehabt hab von ainer pewnt Akcher wegen Gelegen ze Stolhoffen zenagst dem freythof vnd uon hern Vlrichen vor czeiten Pharrer ze Stalhouen mit Erbschaft an mein Hausfraun vnd mit geschafft von derselben meiner Hausfraun an mich komen ist Der bemelten vnserr zwitrecht vordrung vnd zuspru^ech wir vorgenant baid tail mit gu^eten willen vnd bedechtlich hinderganngen vnd hindergengig worden seinn hinder den Edeln herren hern Vlrichen Eyczinger von Eyczing vns mit seinem Spruch darumben ze entschaiden Dem wir denselben seinen Sprach zu baiderseitt gelobt vnd uersprochen haben zehalden vnd an all ausczug geineinander zuuolfuern Der vns also aller vnserr zwitrecht vordrung vnd zuspru^ech Nach vnser baider fu^erbringen entschaiden vnd mir vorgenantten Winkchler fu^er all mein vordrung wie sich die zwischen vnser von der Pewnt wegen vncz auf hewtigen tag dato des briefs begeben haben nichts ausgenomen Ain Sum gelts von dem vorgenanten Brobst Johannsen seinem Kapitl vnd Goczhaus zegeben gesprochen hat der ich von In zu rechten tegen vnd an allen schaden gancz ausgericht vnd beczalt bin vnd in solicher maynung das ich mein eriben noch annder nyemants von vnsern wegen zu dem vorgenantten Brobst Johannsen seinem Kapitl vnd Gotzhaus noch auch zu allen Irn nachkomen daselben von der vorgenantten Pewnt Akcher wegen dhain vordrung zuspruch noch ansprach nymermer haben noch gewynnen sullen noch wellen Wenig noch vil In dhainer weis getrewlich vnd vngeuerlich Sunder die vorgenant Pewnt Akcher sol hinfu^er ewigcleich bey der bemelten Kirichen ze Stolhouen dem Goczhaus Herczogenburig vnd allen Irn nachkomen beleiben Das alles ist mein gu^etlicher will vnd gelob fu^er mich vnd mein eriben das wir das alles ganncz stet vnd vnczerbrochen vnd volfürn wellen an widerred Mit vrkund des briefs den Ich vorgenantter Winkchler dem vorgenantten Brobst seinem Kapitl vnd allen Irn nachkomen des goczhauss daselben gib fu^er mich vnd mein eriben besigilten Mit des Edeln Sigmundts Lewprechtinger dieczeit Phleger auf dem Kallmperig Anhangunden Innsigil, den ich bemelter Winkchler mit vleis darumb gepeten hab Im vnd sein eriben an schaden wann ich aigen Innsigil nicht enhab Darunder Ich mich verpind mit meinen trewn fu^er mich vnd mein eriben war vnd stet czuhalden was an dem brief geschriben stet Des ist czeug durich meiner vleissigen pet willen der erber vnd weis Michel Meunseer Richtter ze Klosternewnburgkch mit seinem anhangunden Insigil Im und sein eriben an schaden. Geschehen ze wienn an sand Anthoni tag Nach Kristi vnsers lieben herrn gepurd vierczehenhundert vnd In dem Acht vnd vierczigistem Iare.sy

Source Fulltext: FAIGL, Herzogenburg (Wien 1886) S. 474-476