Wir Johanns Brobst Vnser frawnn goczhaws zu Tirenstain Vnd der Conuent gemain doselbs des Herrn Chloster Vergechen fu^er vns vnd vnser nachkomen vnd twnn kund offenlich mit dem Brieff allen den er fu^erkumpt das vns der Erwirdig geystlich herr her Johanns Brobst Sand Georgn gotzhaws zu Hertzogenburg vnd sein Conuent doselbs durich sunder lieb vnd gunst willen rechtlich vnd redlichen gelassen haben Inbestandesbeys zu verlust vnd zegwin iren dryttal zechent den sew habent In vnser pharr zu Grauenberd an wein vnd angetraid vnd auch In klaim zechent wye dye genant sind oder werdent nichts dorin awsgenomen noch hindan gesaczt weder In grossem noch In klainem zechent vnuerschaidenlich awff die nagst ku^enfftign zweliff Iar nach datum des Brieff also beschaidenlich das wir vnd vnser nachkomen In dauon dew benanten zweliff Iar Jerleich raichen vnd geben schullen acht vnd dreyssigkch phurit phennig an alles vercziechen zu den weinnachten getrewlich vnd vngeuerlich Besech aber das dye vorgenanten zechent verdu^erben mit reyffen wassern Schewrn Pissa^ezz oder anderm vngewiter dorin schullen wir vnd vnser nachkomen selber die bagnuss haben vnd se seind vns vnd vnsern nachkomen nichts dorum pflichtig vnd schuldig nach zelassen in dem benanten Iarzins von derselben scha^eden wegen Se wolten dann das twnn von guetem willn Es bescha^ech dann das ainer gemainer zug In das land wu^erd van den veynten die getraid vnd ander fru^echt auff dem veld verbuechsten vnd verderbten oder Inden Sta^edln ee man den getraid awsgedreschen mo^echt verpranten oder andrew irrung in dem Paw oder in dem vessen der fru^echt von den veynten gescha^ech welichs iars das wer so schulln wir vnsers tayls zwen erber man des geleychen dye vargenanten herrn van Hertzogenburg irs tayls auch zwen dar zu geben dye egenanten scha^eden zeweschawnn vnd was dann dye vngeuerlich sprechent vnd erkennent das sew vns dorum ze statn vnd zu Hilff komen schulln das schulln sy vns dann guettigkchlich nachlassen an der vargenanten Sumb gelts dew wir In dann phlichtig vnd schuldig sein zu raichen we^ar aber das wir den vargenanten herrn van Hertzogenburg an der obgenanten Sumb gelts zu den weinnachten vber irn willn verczugen vnd Sawmig wern was sew dann des schaden nemen wye der genant wirdet dhainer awsgenomen denn ainer vngeswarn mit slechten warten gesprechen mag der den Brieff mit irem guetlichen willn fu^erpringt denselben schaden mit sambt dem hawbtguet schulln wir In ga^entzlich awsrichten vnd widerkern an alln irn schaden vngeuerlich Mit vrkund des Brieff Besigilt mit vnserm vnd auch mit vnsers Conuent anhangunden In Sigiln der do geben ist noch Christi gepurd virtzechenhundert darnach In dem achtvndvirtzigkistem Iar an Sand Merten tag.

Source Fulltext: FAIGL, Herzogenburg (Wien 1886) S. 476-477