In nomine Patris et Filii et Spiritus sancti. amen. A memoria mortalium gesta labi poterunt vniversa, que suo tempore future posteritati sub cyrografo non firmantur. Huius rei gracia nos Heinricus de Sevelde, ministerialis Austrie per successivam humane condicionis inpotenciam nos scientes aliquando morituros, tam presentibus quam futuris significamus per hec scripta , quod cum dominus Chonradus bone memorie quondam venerabilis prepositus Neuenburgensis, et venerabilium fratrum suorum vniversitas ab dileccionem nostri ipsorum quurn liberalitatis gracia aliquam partem ecclesiastici ornatus, duas cappas videlicet, talmaticam et subtile et totum preparamentum sacerdotale preter casulam et quitquit ad decorem altaris pertinet scilicet purpuram et pallam et duo linteola parva cum duabus stolis sacerdotalibus nobis pro tempore vite nostre concessissent et nos delectati habere illa ipsis denuo supplicassemus, quatenus eundem ecclesie nostre ad dies nostros, ut supra diximus, comodarent, ut coram nobis divina fierent in eodem, iidemque fratres nostre peticioni favorabiliter annuissent, vnde nos digne ipsorum devocioni respondentes terciam partem molendini in Hedersdorf, que nos contingit, ecclesie Neuenburgensi sine omni contradiccione parentum nostrorum perpetualiter delegavimus libere possidendam. Insuper ut de reddicione predicti ornatus cerciores esse debeant nos defuncto, vineam nostram sitam in Chalenperge dictam Gozroch ipsis per manum filie nostre domine Alheidis et domini Rapotonis de Valchenberch et domini Hadmari de Werde taliter obligavimus, vt dicta vinea ab omni nostrorum parentum hereditate sit aliena, donec isti fratres suum ornatum vna cum nostro plenario integraliter se gaudeant accepisse. Quod si neglectum fuerit aut obmissum, ipsi fratres predictam vineam in sua potestate tamdiu retinebunt, quandiu ornatus sepe dictus ipsis integraliter non reddatur. Si autem aliquis parentum nostrorum nos mortuo iusticiam habens in vinea premissa et ipsam voluerit rehabere, assignet prefate ecclesie XX libras den. wienn. pro ornatu, et sic prefatam vineam possideat cum quiete. Si vero memorati frates nos adhuc vivente vel non existente ornatum suum cum plenario nostro integraliter rehabebunt, vinea nostra ipsis pro pignore deputata ad nos et nostros parentes libere revertetur. Ut autem cuncta, que premissa sunt, a partibus inviolabiliter observentur, presentem literam nostri sigilli nostrorumque parentum sigillorum munimine confirmatam eidem ecclesie dari fecimus in signum evidens et cautelam. Huius donacionis testes sunt, Dnus Ulricus decanus, dnus Vlricus de paumburch, d. Pabo, d. Ortolfus, d. Otto, d. Otto hospitalarius, d. Wernherus, d. Waltherus, clerici d. Pilgrinus, d. Dietmarus Merlo. D. Hainricus de Ruchendorf, d. Dietricus officialis, d. Marchardus, d. Hainricus de Gawats milites, hainricus de Molt, Otto de harroz, Ortolfus Levbaner, Gotfridus, Otto cellerarius, herbordus, Chunradus tvrnhere servi et alii quam plures. Datum in Sevelde anno domini M°CC°LV°.

Source Fulltext: ZEIBIG, Klosterneuburg (=FRA II/10, Wien 1857) S. 7-8