In nomine domini. Amen. Nos Pabo dei gracia Newnburgensis ecclesie prepositus, Hiltprandus decanus vniversis fratribus eiusdem ecclesie presentibus et futuris salutem in domino sempiternam. Cum ex ludo taxillorum multa pericula proveniant animarum, vt sunt avaricia, que radix est omnium viciorum, cupiditates, mendacia, fraudes, doli, vituperia, odia, dissensiones. litigia, opprobria, inimicicie, detracciones et nonnumquam homicidia, scandala, rixe, furta; nos huiusmodi pericula vitare volentes, nostrisque fratribus acfame ecclesie sie precavere, comunicato consilio fratrum nostrorum ipsum ludum tamquam morbum pestiferum volumus de cetera a nostris subditis arcius evitari, firmiter statuentes, vt qui de cetero inventus fuerit de nostris fratribus cum layco vel clerico ludum huiusmodi exercere, ipso facto teneatur tres ferias sextas imediate subsequentes pro dicta culpa in pane et aqua in nostro refectorio sedens in terra humiliter abstinere. Assedentes et ipsi ludo et consencientes ac ipsum ludum quomodolibet instaurantes vnam feriam sextam proximam subsequentem similiter abstineant ieiunando. Et quicunque hanc nostram institucionem transgressus fuerit et non satisfecerit jejunando, illum ex nunc excommunicatum decernimus lata sentencia in hiis scriptis, ingressu ecclesie ipsi nihilominus interdicto, donec de culpa sua conpetenter satisfecerit et condigne. Qui vero nec sic resipuerit, sed nostre constitucionis prevaricator exstiterit, illum vsque ad vnum mensem a prebenda vini et prebenda coquine esse decernimus iam privatum, salvis aliis penitenciis, que obstinatis et inobedientibus sunt secundum rigorem regule institute. Inhibemus eciam et sub pena excommunicacionis firmiter volumus observari, ut nullus de cetero canonicorum nostrorum alteri fratri crimen obiicere vel improperare debeat manifeste sed si alter de hoc crimine in veritate constiterit, ille in nostra ac capituli tocius presencia fiducialiter manifestet, ac se ibidem illud, quod dicit, offerat probaturum, quod si non fecerit et in probacione defecerit, criminatoris sentencia puniatur, et illum, quem diffamaverat, suo iuramento teneatur coram fratribus nichilominus expurgare. Datum et actum in capitulo Newnburgensi Anno domini M°CC°LXXXIX°. presentibus canonicis infra scriptis. Qui sunt D. Hiltprandus decanus, Otto de Arnsperg, Meinhardus, Otto de prunsperch, Hugo, Albertus custos dominarum, Hadmarus dictus asinus, Heinricus de pyela, Ortolfus dictus preutel, Dittricus plebanus sancti Martini, Ortolfus filius Weychardi, Wysento, Paulus hospitalensis, Rudgerus magister refectorii, Hertwicus custos, Perchtoldus magister infirmarie, Stephanus, Magister Johannes, Jacobus, Heinricus de hovsek, Otto de leubs, herbordus, Karulus, Albero de Gebneys, Albero de Sibenhirten sacerdotes, Otto pedagogus, Stephanus de Siedendorf, Perchtoldus de Alls, Eberhardus diaconi.

Source Fulltext: ZEIBIG, Klosterneuburg (=FRA II/10, Wien 1857) S. 35-36