Th(eodoricus) episcopus Olomucensis dilecto in Christo Wilhelmo Clerico filio domini Rycholfi plebani de Laa salutem in domino. Licet ad presentacionem domicelli de Dyax qui cognominatur pincerna, anno preterito in ecclesia Dyax, in quam idem pincerna ius obtinet patronatus, te rectorem instituerimus et plebanum, quia tamen ut percepimus, institucionis tempore defectum paciebaris natalium ex sacerdote genitus et soluta, propter quod institucionem et confirmacionern nostram minus sufficientem reputans ad apostolice sedis gremium recurristi et meruisti, ad omnes sacros ordines et ad beneficium eciam cum cura ut promoveri licite possis non obstante defectu predicto eiusdem, apostolice sedis dispensacionis remedium reportare, propter quod humiliter petisti, per nos ratificari institucionem predictam. Nos igitur tuis peticionibus inclinati ac volentes apostolicam graciam tibi reddere fructuosam, institucionem nostram, que prius erat invalida ratificare, presentis scripti patrocinio corroboramus eandem ac innovamus et esse volumus perpetuo valituram. In cuius rei testimonium sigillum nostrum presentibus est appensum. Datum in Modricz Anno domini M°CC°XC.° VII Idus Marcii Indiccione tercia.

Source Fulltext: ZEIBIG, Klosterneuburg (=FRA II/10, Wien 1857) S. 36-37