Ich Ott herrn hevnleins svn von Tuln vnd mein hausvrow vroiv Reichcz tun chunt vnd veriehen allen den, di disen brief sehent oder horent lesen, daz wir einen weingarten, der haizzet der Ger vnd leit dacz Nuzdorf vnd ist halbes ieuch vnd ist meiner hausvrowen erbe gewesen, verchauft haben herrn Vlreichen von Chriczendorf des herczogen hofmaister von Oesterreich vnd seinem svne hern Vlreichen vnd seines svnes hausvrowen vrown Reichczen vmb vir vnd dreizzig phvnt wienner phenning. Des chaufes ist scherme worten ich Otto selbe und mein housvrow vrow Reichcze vnd mein swiger vrow Reichcze di Scheuchinne vnd mein Gesweinn baide her Vlreich vnd her Marchart vnd meiner housvrowen swester man Rudolf also beschaidenleich, ob der vorgenant her Vlrech der hofmaister des herczogen von Oesterreich vnd sein erben vmb den weingarten immerme angesprochen werden, swaz er des schaden nimt den schaden suln wir im ablegen. Vnd daz der chauf also stet beleibe, des gibe ich Otte disen gegenwertigen brief ze einem vrchvnd mit meinen insigel vnd mit meiner Gesweinn insigel hern Vlreichs vnd hern Marcharts der vorgenanten vnd mit meiner housvrowen swester man Rudolfs des vorgenanten insigel versiget. Des ist gezeuge her fridreich von Chriczendorf, des hofmaisters pruder, her Starchant von Nuzdorf der Chelermaister, her Ortolf von der heiligenstat, her Chol der amman von Newnburch, her friderich der hutstok, her Chvnrat der hormarchter, des herczogen huebmaister, hermann Imian von Newnburch, Gerunch hern Choln svn, Nicolaus von Newnburch vnd ander biderbe leut. Der brief ist gegeben ze Wienne an sant Katherine tag da von christes geburt waren tausent zwai hundert Jar vnd in dem drein vnd Neunczigisten Jar.

Source Fulltext: ZEIBIG, Klosterneuburg (=FRA II/10, Wien 1857) S. 44