Ich Ernst der Lederer vnd ich Geisel sein chvn wir vergehen vnd tvn chunt allen leuten, daz wir vnser mule mit sampt dem haus in der Staingrvebe mit vnsers purchherren hant Probst Stephans [66] ze Newnburch gesaczt haben Ruegern dem Stekkendorfer vnd sein erben fur vierczehen march silbers vnd ain vierdunch, fur igleich march zwen vnd sibenczig grozzer pehämischer phenning, da von wir in dienen sullen alle iar anderthalb march silbers; vnd ob wir in zwain iaren daz selb purchrecht nicht lO^esen vmb das vorgenant silber oder ze lO^esen haben, so sullen wir daz vorgenant purchrecht verchauffen vnd sullen iz bestiften mit einem erbern mane, der vnserm egenanten herrn dem Probst mazzich sei mit dem alten dienste. Haben auch daz gelobt mit guetleichem willen, ob wir des nicht teten vnd daz versaumpte so sol vnser herre der Probst oder sein anwalt daz purchrecht verchauffen nach der vmbsezzen rat vnd den vorgenanten Ruegern des silbers gar vnd genczlich weren. Das dis wandelung vnd der vorgedacht chauf stet vnd vnzerbrochen beleib, dar vmb geben wir vnserm oft genanten herrn dem Probst disen prief zu einem vrchvnde diser sache versigelten mit des erbern mannes insigel Gebhartes von sant Mertein. Des ist geczeug Chvnrat der sybenhos, zv den Zeiten richter, Gerbort der slvzzler, Christan sein prueder, der weigan von Christendorf, Ott der hueter vnd ander erber leut genuech. Der prief ist geben vnd dicz geschehen, da von Christes purd ergangen waren drevczehen hvndert iar.

Source Fulltext: ZEIBIG, Klosterneuburg (=FRA II/10, Wien 1857) S. 65-66