Ich Vlrich hern Starchandes svn von Nuzdorf vnd mein Havsvrowe ver Chvnegunt wir verichen - - - daz wir habeverchauffet dem erberem Gotzhavse vnser vrowen datz Newnburch vnd auch der Sammenvnge vnsers rechten aygens, daz vns angevallen ist von vnserem Sweher hern Levpolten von Wultzendorf vierdhalben Schillinch geltes vnd zwen phenninge rechter phenninge geltes, der selben gulte der ligent sechzich phenninge auf einem pavngarten, vnd auf einem weingarten datz Newmburch pei Sande Mertein, vnd ligent siben vnde vierczich auf einer hofstat pei meiner Vrowen Sande Chvnegvnden vmbe vier phvnt phenninge an sechzich phenninge vnd Nevn Schillinge geltes auf einem halben lehen datz Asparn bei Stadlawe vmbe ainlef phvnt vnd vmbe sechzich phenninge - - - so gib ich vorgenanter Vlrich diseprief zv einer sichtigen Vrchvnde versigelten mit meinem Insigel vnd mit meines Swechers Insigel Hern Levpolts von Wultzendorf, vnd mit den gezevgen, die hernach geschriben stent. Daz ist Her fridrich der Huetstoch, her Wernhart der Schifer, her Hermann Ymian, her Ortolf von der Heyligenstat, Ruger von der Heiligenstat, Jans von Nuzdorf, Wilhalm der Weidhavser vnd ander biderber levt genuege. Diser prief ist gegeben, do von christes gepurt ist gewesen Tavsent iar, drev Hvndert iar des Sampcztages nach vnser vrowen tag der Liechtmesse.

Source Fulltext: ZEIBIG, Klosterneuburg (=FRA II/10, Wien 1857) S. 61