Ich Friedreich von Liechtenstain und ich Chvnigunt sein hausvrowe wir verichen vnd tuen chunt allen den, die disen prief lesent oder horent lesen, die nu lebent vnd her nach chunftich sint daz wir mit gesampter hant vnd mit guetem willen vnd mit verdachtem muet vnd mit zeitigem rat vnser vreunde vnd auch mit ir aller willen verchauft haben vnsers rechten aygens ein lehen vnd drei hofstet dacz Drayzzenhoven, die gelten alle iar an sant Michels tag Dreiczehen schilling wienner phenning vnd nicht anders. Daz selb vorgenant lehen vnd drei hofstet hab wir gegeben vmb sechczehen phunt wienner phenning der wir recht vnd redleichen gewert sein, dem erbern gotshaus vnser vrown vnd der samnung ze Newnburch ledichleichen vnd freyleichen ze haben vnd all iren fromen da mit zeschaffen, verchaufen, uerseczen vnd geben, swem si wellen an allen irrsal. Vnd dar vber durch pezzer sicherhait, so sezze wir vns, ich fridreich von liechtenstain vnd ich Chvnigunt sein hausvrowe vnd ich Weichart von Paumgarten vnd ich Agnes sein hausvrowe dem vorgenanten Gotshaus vnser vrowen vnd der Samnvng dacz Newnburch vber daz||
vorgenant lehen vnd drei hofstet dacz Drayzzenhoven ze rechtem scherm vnverschaydenleich als aygens recht ist vnd des landes gewonhait. vnd geben dar vber dem vorgenanten gotzhaus vnser vrowen dacz Newnburch vnd der samnvng disen prief zu einem sichtigen vrchund vnd zu ainem offen geczeug vnd zu einer ewigen vestenung diser Sache versigelten Ich vorgenanter fridreich von Liechtenstain mit meinem Insigel vnd ich Weychart von Pavmgarten mit meinem insigel. Geczeug diser sache sint her Stephan von Meyssowe, des Gotshauses vogt, her Chalhoch von Eberstorf der chamerer, her Marquart der Mystelpech, her Vlreich von Wolfgerstorf der Lantrichter, her Vlreich von Terenberch, Vlreich von Stigsperch, Vlreich von Streitdorf, Othacher vnd Nyclaus die vier prueder vnd ander piderb leut genuech, den diesev sache wol chunt ist. Diser prief ist gegeben ze Newnburch an sant Cholmans tage nach Christes geburt Tausent iar vnd drev hundert iar.

Source Fulltext: ZEIBIG, Klosterneuburg (=FRA II/10, Wien 1857) S. 64-65