Ich Rueger von Staucz, ze den zeiten Richter ze Neunburch Chlosterhalben, Duen ze wizzen allen den, die diesen prief sehent oder hvrent lesen, die Nv lebent oder her nach chvnftich sint, Daz vru Jente von der heiligen stat chlait vm ir wirtes Dot Christanes hincz Chunraten des Meisne es svne von der heiligen stat, vnd chlait sv lang, vncz im chom mein vurbot. Do er des in warde, do chom er fur mich vnde fur die erberen pvriger in dev schran, vnd antburt ir mit forsprechen. Do ward im ertail, er schvlt sich bereden, do beret sich der vargenant Chvnrat, dez vorgenanten Todeslages Recht vnde Redeleich an gabe, vnd an alle phenengen, alz recht ist der stat, vnde auch des Landes vnd auf dev rede, daz er furbaz sicher beleibe var mir, vnde var allen Läuten vnd var allen Richtern, So gibe ich im mein prief zve einem sichtigem vrchvnd, vnd zve einer ewigen festnvnge versigelten mit meinen Sigel. Vnde mit den erberen zevgen, die her nach geschriben stent: Jacob Varster, Gerbot, Otto Hvmmel, Hainrich mosel, Fridrich ene, Frederich hiezman, Ortwein Mariaekker, Alram bej der Tvenaow, Leupolt zwischen den wegen, Gerhart, Otto Hveter, Hainrich von La, vnd ander frumen Läut genvege. Disev beredung ist geschehen, do von christes geburt ist ergangen Drevzehen hundert Jar, dar Nach in dem Sechsten Jar.

Source Fulltext: ZEIBIG, Klosterneuburg (=FRA II/10, Wien 1857) S. 105-106