Wernherus dei gracia Ecclesie Pataviensis episcopus dilecto in Xsto fratri domino Perhtoldo venerabili preposito Newnburgensis ecclesie salutem et sinceram in domino karitatem. Cum fides apostolica periculoso et detestabili Monialium statui, qui extra sua monasteria nonumquam per habitacula secularium personarum discurrunt, providere cupiens statuerit constitucione irrefragabiliter valitura, vniversas ac singulas moniales presentes atque futuras cuiuscumque sint religionis vel ordinis in quibuslibet mundi partibus existentes sub perpetua clausura in suis monasteriis debere de cetero permanere, exceptis certis casibus, quorum quidam vestras moniales non tangunt, quidamque raro contingunt, et alibi cavetur (cantatur) sub pena excomunicacionis, ne de cetero aliquis quamcumque religionem tacite vel expresse professus in scolis vel alibi temere habitum sue religionis dimittat, dileccioni vestre in virtute sancte obediencie firmiter comittimus et districte mandamus, quatenus circa conventum Monialium vobis subiectarum mandata apostolica diligenter servaturi ex nunc in antea nullam de vestris emittatis vel exire sinatis monialibus, in quo usque vos deliquisse cognovimus, sine nostra licencia speciali, utpote qui de causa huiusmodi, utrum sit racionabilis pro tali exitu, cognoscere volumus iudicio racionis. Datum Ebelsperch Anno Dom. M°. CCC°. septimo Kal. Julii.

Source Fulltext: ZEIBIG, Klosterneuburg (=FRA II/10, Wien 1857) S. 106-107