Ich Vlreich von Chriczendorf - daz ich vor rechter ehafter gvlte, der ich vnd mein chvn vrowe reicz, der got genad, schvldich wurden mit gesampter hand Maruschen dem Juden ze Wienne mein gut ze Enzestorf zwaier phvnt vnd vier phenning gulte, di mein rechtes lehen waren von dem gotshaus ze Newnburch vnd meines aigens zwen vnd drezzich Emmer weingulte an perchrecht vnd an zehent vnd ain halbes phvnt phenning gvlte daz auch zu dem selben perchrecht gehoret, daz gelegen ist an dem pu^esemperg ze chauffen han gegeben dem ersamen Ritter hern Wernharte dem Schiver vmb vierzich march lO^etiges silbers wienner gewichtes des er mich genczleich vnd gar gewert hat hincz dem vorgenanten iuden, vnd han auch ich vnd mit sampt mir mein zwen svne Rvdolf vnd Hainreich vnd mein tochter Lucein vnd mein aidem Reimbot dem vorgenanten hern wernharten das selbe gut aufgegeben - Diser sache sint geczevge her Wernhart von Topel, her Vlreich von dem gereut, Gerunch chol, Jacob der forster, Engeldiech, wisent von Egenburch, herman von freising, friedrich der huetstoch, Gebhart von Rueckerstorf, Jacob der chelner, Gebhart von sant Mertein, Ott der hueter, fridreich, weigantes svn - Diser prief ist gegeben ze Newnburch, da man zalt nach Christes gepurte drevczehenhvndert iar, dar nach in dem ainleften iar an dem nachsten eritage vor mitter vasten.

Source Fulltext: ZEIBIG, Klosterneuburg (=FRA II/10, Wien 1857) S. 124-125