Ich Dietreich hern Starhandes svn von Stadlowe vergich - daz ich mit gunst vnd mit gutlichem willen meiner chvnne frovn Margreten vnd aller meiner erben, den hof, den mir mit gunst vnd guetleichen willen aller ir erben mein Anfrowe Mechilt, hern Vlreiches witib von Rizendorf, dem got genad, vnd mein Oheim Herr Vlreich, desselben hern Vlreiches svn zu chouffen heten gegeben, des anderthalb lehen ist vnd ist gelegen ze Alpitowe Ouf dez Gotshouses aigen von Nevnburch - ze chouffen han gegeben - dem ersamen herren hern Perchtold dem Probst vnd seinem Gotshovs ze Nevnhurch vmb hvndert vnd vmb dreizzig phunt phenninge wienner mu^enzze - Darzu ist mir lazzen aller hande dienst, der von demselben hof dem Gotshous drew iar an vnderlazz versezzen ist, vnd han ouch mich des selben hoves fvrzicht getan - vnd ouch des werdes, der in der Tuenowe gegen Alpitowe vber gelegen ist, des der vorgenant herr Vlreich von Rizendorf wider daz recht von dem Gotshous ze lehen iach. - Dar vber ze sicherhait geben wir Ich vnd mein bruder Chvlman - disen prief mit vnser paiden insigeln versigelt. Diser sache sint gezeug her Chunrat von Siczendorf, her Wolfger von owe, her Wernhart der Schiver, her Vlreich von Chriczendorf, di Ritter. darnach Gerunch, hern Choln svn, Dvrinch von Mevrling, Johannes von Nuzdorf, Ruger von der heiligenstat, Herman von freysing, Chunrad, Rudwein, Gundolt,||
Engeldiech, Wisent von Egenburch. Fridreich der hutstoch, Gebhart von Ruekerstorf vnd ander frum leut genuech. Diser Brief ist gegeben - dreutzehen hundert iar, darnach in dem ainleften iar des nachsten svntages vor dem ovfertag.

Source Fulltext: ZEIBIG, Klosterneuburg (=FRA II/10, Wien 1857) S. 126