Ich Hainreich von der Neyzze, vnd ich andre purger ze wienne wir vergehen vnd tuen chunt allen den, die disen prief horent oder lesent. Daz der ersame herre her Perchtolt Brobst ze Newnburch durch vnser pet willen Nyclan Levbmannes svn, vnserm frevnt ainen weingarten, des ain halbes ieuch ist, gelegen an der weizzenleitten, des er rechter perchherre ist, vnd der so lange vrbowe was gelegen, vncz er in rechten perchtaidingen ze reisach gesait wart, vnd in sein gewalt ertailet, recht vnd redeleich ze rechtem perchrecht verlihen hat furbaz zehaben vnd ze besiczen ze rechtem perchrecht von dem Gotshaus. Geschech aber, daz vil leicht dem Gotshaus her nach von swelhand sachen chriech oder ansprach davon auf erstuend, in dem chriech vnd gegen der ansprache schullen wir vns seczzen, vnd das Gotshaus an allen schaden da von pringen. Diser red ze ainer sicherhait geben wir dem Gotshaus disen prief mit vnser paider insigel versigelt. Diser sache sint geczevge her Wernhart vnd her Hainreich di Chrvnneste. her Dietreich von dem Chalnperg vnd her Ernst, der Vezzelsneider vnd ander frum leut genuech. Dieser prief ist gegeben ze Wienne, da man zalt nach Christes gepurte drevzehen hvndert iar, dar nach in dem zweliften Jar an sant Barnabe tag.

Source Fulltext: ZEIBIG, Klosterneuburg (=FRA II/10, Wien 1857) S. 135