Magne laudis et immense devotionis viris, Dominis Stephano Preposito ac universo suo Collegio Ecclesie Neunburgensis Frater Carolus de Treveri Magister generalis hospitalis sancte Marie Theutonicorum Salutem in eo, qui est omnium vera salus, cum promptitudine complacendi. Vestre sinceritatis ac favoris merita nos invitant, ut vestris honoribus et utilitatibus ac animarum vestrarum commodis tanto studiosius intendamus, quanto vestra devocio hoc exigit et persuadent beneficia exhibita et impensa. Hinc est, quod attendentes vestre sincere devotionis et dilectionis affectum, quem vos ac antecessores vestri ad nostrum ordinem, ut accepimus, geritis et gessistis et geretis in antea, ut speramus, vobis et vestro sacro collegio, ac antecessoribus vestris omnium Missarum, orationum, Jejuniorum, abstinentiarum, vigiliarum, disciplinarum, sanguinis effusionum contra inimicos crucis Christi, Elemosinarum, largitionum ceterorumque bonorum, que per fratres totius ordinis nostri Dominus fieri permiserit,participationem,communionem et confraternitatem tenore presentium concedimus in vita pariter et in morte. In cuius concessionis evidentiam presentem literam sigilli nostri appensione fecimus communiri, Datum frankenfort tempore nostri Capituli generalis Anno Domini M° CCC° XVIIII° In die Exaltationis S. Crucis.

Source Fulltext: ZEIBIG, Klosterneuburg (=FRA II/10, Wien 1857) S. 174-175