Ademarus Targa, Archipresbiter sancti Affricani et Nuncius sanctissimi patris domini nostri, domini Johannis celesti provisione pape XXII. Ad Civitatem et provinciam Salzburgensem et ad alias partes Alamanie pro colligendis fructibus beneficiorum vacancium et aliis negociis sedis apostolice constitutus. Reverendis patribus, Patriarchis, Archiepiscopis, Episcopis et Illustribus ac spectabilibus viris, dominis Regibus, Ducibus, Comitibus, Baronibus et aliis inferioribus, cujuscumque gradus condicionis existant, et venerabilibus ac discretis viris, dominis Abbatibus, prepositis, Decanis et aliis personis ecclesiasticis exemptis et non exemptis, ad quos presentes littere pervenerint, salutem in filio virginis benedicte, et mandatis nostris, immo verius apostolicis, firmiter obedire. Cum venerabilis et religiosus vir, Dominus Stephanus, prepositus Monasterii Newnburgensis pataviensis diocesis pro exhibendis honore et reverencia sedi apostolice venerit ad nos Salzburgam cum magnis periculis, sumptibus et laboribus, Nos prefatum prepositum et Monasterium suum, et eius bona auctoritate nobis commissa sub proteccione prelibati domini nostri pape ponimus Injungentes tamen cum reverencia dignitatis Episcopalis sub virtute sancte obediencie et pena ingressus Ecclesie vobis dominis Patriarchis, Archiepiscopis et Episcopis, et sub pena excommunicacionis vobis dominis Regibus, Ducibus, Comitibus, Baronibus, Abbatibus et prepositis et aliis omnibus ecclesiasticis et secularibus personis, ne prelibatum Dominum Stephanum vel suum Monasterium ledatis, vel in aliquo molestetis, quod si facere omiseritis infra VI dies a tempore monicionis vobis facte, ablatum non restitueritis, et de iniuriis sibi illatis vel Monasterio suo digne non satisfeceritis canonica monicione premissa predictorum VI dierum, quorum duos pro primo, duos pro secundo, et residuum pro tercio et peremptorio termino vobis et vestrum cuilibet assignamus, vobis dominis Episcopis et aliis supranominatis ingressum Ecclesie interdicimus, et pro predictis causis exnunc, vt extunc in hiis scriptis. Si vero vos,.domini Reges et alii supradicti, abbates, prepositi et alie persone ecclesiastice (sive) seculares seu layci predicta facere omiseritis, et infra sex dies, vt supra expressum est, non restitueritis ablata, vel de iniuriis non satisfeceritis, nos exnunc vt extunc legitima monicione premissa vt supra dictum est in hiis scriptis, pro predictis causis vos excommunicamus, Inhibentes, ne aliquis a predictis sentenciis preter auctoritatem prelibati domini nostri pape, vel nostram, nisi in mortis articulo absolvat aliquos predictis sentenciis irretitos, et tunc caucionem ydoneam, seu quantum prestare poterunt, sollempniter exigat, Quodsi aliter absolucionem concesserit, Nos predictam absolucionem nullam et irritam reputamus, et in fidem et testimonium premissorum sigillum nostrum, quo vtimur, duximus apponendum. Datum Salzburge Anno domini M° CCC° XIX°. feria secunda post divisionem Apostolorum, Pontificatus prelibati domini nostri pape Anno Tercio.

Source Fulltext: ZEIBIG, Klosterneuburg (=FRA II/10, Wien 1857) S. 171-172