Nos Albertus, Dei gracia Ecclesie Pataviensis Episcopus ad perpetuam rei memoriam. Cum iuxta officii nostri debitum in Monasterio Neunburgensi Canonicorum Regularium Ordinis Sancti Augustini nostre Diocesis in vtroque Conventu Sancte visitacionis officium personaliter ageremus, Invenimus, quod non nulla circa personam et Statum Venerabilis Stephani Prepositi ibidem, quedam circa personas alias, et quedam circa officinas, et diversa negocia Monasterii interiora et exteriora reformacione quam plurimum indigebant, Quorum quibusdam dilacionem non capientibus tunc in nostri presencia correctis et mutatis, Ipso eciam preposito cum aliquibus ex Canonicis pro excessibus et insultibus in personam Hertwici Decani et quorundam fratrum in capitulo indebite factis ad alia Monasteria eiusdem ordinis pro bono pacis ad penitenciam agendum ad tempus emissis, Circa reliqua ipsi Monasterio, fratribus et Dominabus vtriusque Conventus sollerti circumspeccione providere volentes, de VenerabiÍium et discretorum virorum Henrici, Monasterii sancti Ypoliti, Trustonis Monasterii in Herczogenburga, et Hugonis Monasterii Sancti Andree Prepositorum ordinis eiusdem, Magistri Ludolfi, Decani Chremensis, Magistri Henrici Canonici Pataviensis, Imperialis aule Notarii et aliorum Sapientum curie nostre consilio taliter duximus statuendum, diffiniendum et ordinandum. Primo enim statuimus, vt omnes fratres Decano suo, et Sanctimoniales Magistre sue, ipse quoque Decanus, qui pro tempore fuerit cum omnibus fratribus de Capitulo seu Conventu virorum, Magistra eciam cum omnibus Sanctimonialibus de Conventu Dominarum Preposito Monasterii, qui pro tempore fuerit, in omnibus, et per omnia licita et honesta humiliter obediant, Sibique loco Dei tanquam pastori suo, et velud membra capiti sint subiecti. Quia ipse est, qui tenetur altissimo et nobis de ipsis et eorum singulis reddere racionem. Prepositus autem Decanum, et fratres, Magistram et Sorores pie foveat, Paterne corrigat more pii Patris, qui durius provocatus micius corrigit, nec de cetero vnquam verbis crudelibus, presertim ignominiosis, exasperet, et quantum precavere potest, exasperari per alios non permittat. Preterea statuimus, ac sub obtestacione divini iudicii, nec non sub obtentu gracie nostre strictissime prohibemus, ne de cetero Prepositus cum Decano, aut cum aliqua parte fratrum aut Sororum, Decanus cum fratribus, aut aliqua parte ipsorum, Magistra cum sororibus aut parte ipsarum, aut eciam fratres vel Sorores inter se in alterius cujuscumque persone vel partis odium, vel iacturam vllam ligam, conspiracionem, vnionem seu societatem habeant, aut in posterum facere vel quomodolibet inire presumant, sed [186] omnes in Christo per sacri ordinis professionem vnum corpus, vnum cor, et anima vna effecti Deo vnanimiter et concorditer in diurnis et nocturnis Divinis officiis quieto et pacifico corde serviant incessanter. Illud attendentes, quod non nisi in pacis tempore bene colitur pacis auctor. Porro cum hii, qui altari deserviunt, vivere debeant de altari, nec ligari os bovis debeat tritturantis, Statuimus et districte precipiendo mandamus, vt Prepositus fratribus et Sororibus vtriusque Conventus prebendas suas in victu, et amictu, et consolaciones conswetas integraliter iuxta antiquam consuetudinem faciat ministrari, et dominabus specialiter lineas et alias vestes iuxta morem consuetum debitas subtrahi aut diminui nolumus vllo modo. Item statuimus et mandamus, vt hostium et fenestra, quibus itur de domo prepositi et respicitur in Capitulum, omnimodis obstruantur, nec per illa ab aliquo extraneo secreta Capituli videri valeant et audiri. Item Equirream Monasterii, quam habuit Johannes de Syerndorf per prepositum, vbique resumi volumus et haberi. Preterea cum propter sexus fragilitatem mulieres sepius, et quandoque gravius viris infirmari contingat, diffiniendo mandamus, vt quandocumque aliquam, vel aliquas ex Sanctimonialibus adeo infirmari, seu debilitari contingat, quod opporteat aut expediat ad vicinos et honestos consanguineos, seu parentes, aut in Civitatem vicinam ipsam pro causa infirmitatis et recuperacione sanitatis transire, et de hoc constet, aut liquido constare possit Magistre et Sororibus, volumus, vt eidem ad hoc faciendum, vsque ad certum tempus limitandum, per Prepositum huiusmodi licencia non negetur. Insuper, quia mulieres huiusmodi nunc propter debilitates, nunc propter delicaciam, sive sexus fragilitatem specialibus plurimum indigeant consolacionibus vltra prebendam, Volumus, statuimus, diffinimus, et ordinamus, vt libros seu libellos quoscumque, Cyphos et vasa alia, zonas, in quibus pater noster, aut alias oraciones numerare sueverunt, Bursas, Serta, Cingulos, et huiusmodi, que propriis suunt et laborant manibus, que tamen publice et notorie habent et faciunt, de Scitu ipsius Prepositi et Magistre in vita sua vel in morte aut mortis articulo fratribus aut Dominabus, aut aliis quibuscumque personis non suspectis pro animarum suarum remedio, aut alias pro suis necessitatibus seu indigenciis habere, donare, legare valeant libere ac testari pro sue libitu voluntatis. - - Vt autem hec omnia et singa perpetue memorie commendentur, et ne aliquis se per eorum ignoranciam in posterum valeat excusare, presentes diffiniciones‚ statuta et ordinaciones nostras Sigilli nostri appensione fecimus communiri. Datum et Actum Nevnburge Anno Domini M° CCC° Vicesimo secundo, Quarto Idus Junii.

Source Fulltext: ZEIBIG, Klosterneuburg (=FRA II/10, Wien 1857) S. 184-187