Ich Hainreich von Chirichling vnd Helmweich sein sun, wir veriehen - Daz wir gechlait haben hintz Colman von La vmb daz Purchstal, vnd vmb einn Weingarten ligent ze Chritzendorf, vnd vmb allez daz gůt, daz wir ze Chritzendorf gehabt hawen, Daz mein Průder Vlrich von Chirichling, dem Got genade, versatzet het Lebman, dem Juden hincz Wienne, nach der Chlag hawen wir - verchauft Daz selb Purchstal vnd den Weingarten, vnd dar zů allez daz gůt, daz wir ze Chrizendorf gehabt hawen ze Dorffe, ze Velde, versůcht vnd vnversůcht, Dorfgericht, Vogtay, Holcz, Weingarten, vnd dar zů allez Viechwaide, Mulwazzer, Werde, Purchrecht, Perchreht, phenning gult, iz sei aigen oder Lehen - Dem erbern Manne Cholman von La vnd sein erben vmb vier vnd dreizzich phunt phenning wienner munsze - - Wir hawen auch des vorgenanten gůtes alles reht furziht getan des aigens vnd des Lehens, des dorfgerichts vnd der Vogtay mit vnsers herren hant Hertzog Albrehts von Österich, vnd hawen vns furziht getan des holcze, daz da haizzet der Ger mit vnsers Herren hant Pischolf Albrehts von Paszawe - - des Purchstals vnd deWeingarten mit vnsers Purcheren Hant Philipps des Pfarrer von sand Mertein ze Neunburch. Hawent auch di vorgenanten fürsten baide, vnd der pfarrer von sand Mertein Cholman von La vnd sein erben daz egenant gůt allez gelihen - - Daz vber geben wir idisen Brief - versigelten mit vnser baider insigeln - - Dar zv\o durch pezzer sicherhait hawen wir gebeten den erbern herren, hern V\olreichen von Meyssawe, daz er diser sache Zeug ist mit sein insigel. Des sint auch gezeug die erbern Leut, di hernach an disen Brief bei namen geschriben stent: Herr Gervnch, hern Choln svn, her Dieterich der schyfer. Herr Symon der Pellndorfer, vnd di Burger, der Rat von der Stat ze Neunburch Chlosterhalb: Chunrad der Sibenhos, Symon, der Stat Richter, Gebhart vnd Ott der Hůter von sand Mertein, Seifrid am nidern marcht, Friderich der Monseber, Chunrad der schumchenpfenning, friderich der hetzman, Christan der Sluzzler, Chvnrad der schyfer, Lewpolt von Awe, Wernhart des smides sun, Eckhart der Zechmaister, Dieterich der Retzer, Gebhart der Statschrieber, vnd ander frum Leut gen\og, den deu sach wol chunt ist. Der Brief ist gegeben ze Neunburch - Dreutzenhundert Jar‚ darnach in dem dritten vnd zwaintzigisten Jar an sand Michelstag.

Source Fulltext: ZEIBIG, Klosterneuburg (=FRA II/10, Wien 1857) S. 193-194