Ich Fridreich von pirbaum, vnd ich Gedraut, sein hausvrawe, wir veriehen - Daz wir - vnsers rechten aigens ain lehen, des sechs vnd dreizzich Jeuchart achkers sint - daz da leit ze Sinebelvelde ze nachst Perchtoldes lehen des tungler, da man vns alle iar hat von gedienet Newn schilling wienner phenning vnd Newn Chaes vnd ein huen haben gegeben - dem Erbern Gotshaus ze Newnburch vmb acht vnd Sechczig phunt phenning wienner Munzze, der wir gar vnd genczleich von dem selben Gotshaus sein gewert an die Juden, da hin wir seu sotten ze rechter not durfte gelten, Mit so beschaidner rede, Daz Albrecht vnd Hauch, der mechtler vnd ir hausvrowen Margret vnd Gedraut vnd ir erben, oder wem sev daz selbe lehen gebent vnd verchauffent mit dem selben recht dienen vnd geben sullen dem vorgenanten Gotshaus ze Newnburch auf vnser vrawen alter alle iar an sant Michels tag ze rechtem Purchrecht zwen vnd dreizzich phenning wienner Munzze, vnd auch nicht mer, vnd haben auch wir vns gesaczt, ich vorgenanter Fridreich vnd ich Gedraut sein hausvrawe, ich Hainreich der Chriechpavm vnd ich Vlrich von Pirbaum, vnd ich Preide sein hausvrowe, ich hainrich von perawe, vnd ich kathrey, sein hausvrowen, vnd wan wir Ich Ebran Ebrans sun von Sinebelvelde vnd ich Agnes sein hausvrowe, Ich fridreich,||
ebrans prueder, vnd ich O^ertel der fruelinger vnd ich Vlreich, Sigloches sun nicht aigens insigels haben, Dar vber zu einer sicherhait pinten wir vns vnd vnser hausvrowen mit samt vns vnder der vorgenanten insigeln, Fridreiches von Pirbaum, Hainreichs des||
chriechpaumes vnd Vlreichs von Pirbaum vnd hern Hainreiches von Porawe - Des sint gezeuge, die ersamen Ritter her Johans vnd her Chunrat von Syrndorf, her Gerunch der Chol, her Dietreich der schifer, her Chunrat der Nuzdorfer, Durinch von Mauerlinge, wisent von Ruekestorf, Gebhart der alt Richter, Christan, der sluzzler, Cunrat von Porawe, Seifrit sein pruder - geben - Dreuzehen hundert iar, dar nach in dem vier vnd zwainzigistem iar des Sunntages ze Mitter vasten.

Source Fulltext: ZEIBIG, Klosterneuburg (=FRA II/10, Wien 1857) S. 196-197