Universis Christi fidelibus presentes literas inspecturis frater Jacobus, Dei gracia Mothoniensis episcopus, et frater Angelus, eadem gracia Sulcitanus episcopus, Domini pape penitenciarius, et frater Stephanus eadem gracia Veriensis episcopus salutem in domino sempiternam. Quoniam, vt ait Apostolus, omnes stabimus ante tribunal Christi, recepturi, prout in corpore gessimus sive bonum, sive malum, oportet nos Diem Messionis extreme misericordie operibus prevenire, ac eternorum intuitu seminare in terris, quod reddente domino cum multiplicato fructu recolligere valeamus in celis, firmam spem fiduciamque tenentes‚ quoniam qui parce seminat, parce et metet, et qui seminat in benedictionibus, de benedictionibus et metet Vitam eternam. Cum igitur ex parte dilectorum filiorum nostrorum, Gregorii, Petri et Theodorici dicti Burshals de Nuwenburc nobis fuerit supplicatum, ut omnibus venientibus ad Claustrum sancte Marie Virginis In Nuwenburc Pataviensis Dyocesis velimus indulgencias exhibere, Nos - omnibus vere penitentibus et confessis, qui vel que predictum visitaverint Claustrum in ipsius festivitatibus, seu eciam Nativitatis domini, Circumcisionis, Epiphanie, Resurreccionis, Ascensionis, pentecostes Nec non in solempnitatibus beate Marie Virginis, Beatorum Petri et Pauli, aliorumque Apostolorum et ewangelistarum, sancti Johannis baptiste, sancti Nicolai, sancti Stephani, sancti Laurentii, sancti Martini, sancte Katerinne, sancte Margarete, sancte Magdalene, sancte Elisabet, in festo Corporis Christi, in dedicacione ecclesie, in festo omnium sanctorum, In die animarum et per eorum octavas, manusque porrexerint adiutrices Ad fabricam, luminaria seu ornamenta ecclesie supradicte, vel qui corpus Christi secuti fuerint, cum portatur infirmis, vel qui in serotina pulsacione flexis genibus ter Ave Maria dixerint, quilibet nostrum XL dies de iniunctis eis penitenciis misericorditer in domino relaxamus. Dummodo Dyocesanus prestet assensum. In cuius rei testimonium presentes literas fieri fecimus, sigillorum nostrorum Appensione munitas. Datum Rome Anno domini M° CCC° XXVI., Mensis Marcii die XVII. pontificatus domini Johannis pape XXII. Anno eius decimo. Nos Albertus dei gracia Pataviensis Episcopus dictas indulgencias Ratas habemus et gratas, quantum de iure efficacius possumus, Ipsasque sub appensione nostri Sigilli confirmantes patrocinio huius scripti. Datum Wienne Anno Domini M° CCC° Vicesimo Sexto XIIII. Kal. Maij.

Source Fulltext: ZEIBIG, Klosterneuburg (=FRA II/10, Wien 1857) S. 218-219