Ich Dietrich vnd ich Alber, die Prüder von Chirichlinge Wir veriehen daz Jorge der Snaizauf von Neunburch Chlosterhalben von vns vnd auch von Cholman von Lo hat ein Paumgarten, de da leit ze Chrizendorf pei dem alten hof, vnd die Schit vnd daz Weidach, daz vmb demselben Paumgarten leit, vnd auch darzu gehort, vnd daz wir Vnd der Vorgenant Cholman von Lo zu disen zeiten mit einander Vngetailt haben. Den vorgenanten Paumgarten, Vnd die Schu^et vnd daz Weidach, daz darumb leit, hat der vorgesprochen Jorge der Snaizauf mit seiner erben guten Willen vnd gunst - vnd auch mit vnser hant vnd mit Cholmans hant von Lo allesampt halbes verchauft - als er iz an Purchrechtes gewer hergepracht hat, dem erbaren Manne, Weiganden von Chrizendorf vnd seiner hausvrawen Vron Gerdrauten vnd irn Erben vmb zwainczich march silbers, ie zwen vnd sibentzich grozzer pehmischer Phenninge fur die march - Nu haben wir sambt Cholman von Lo - allessampt halbes verlihen Jorgen dem Snaizauf vnd sein erben zu rechten purchrechte, vnd daz ander halffen tail desselben gutes haben wir auch verlihen Weiganden von Chrizendorf vnd seiner hausvrawen, Vron Gerdrauten vnd iren Erben - Vnd wand mein pruder Alber selber nicht aigens insigel hat, davon so han ich dietreich fu^er mich vnd fu^er in geben Jorgen dem Snaizauf vnd seiner erben, vnd Weiganden von Chrizendorf vnd seiner haus Vrowen Vron Gerdrauten vnd iren erben disen prief zu einen Offen Vrchunde, vnd zu einen Waren gezeuge diser sachen Versigelten mit meinem Insigel, Vnd mit meines Oehaims insigel, hern Weichartes von Winchel - Diser prief ist geben ze Wienne - dreuzehenhundert iar in dem ain vnd dreizgisten iar darnach am Perchtag.

Source Fulltext: ZEIBIG, Klosterneuburg (=FRA II/10, Wien 1857) S. 240-241