Ich Nyclas, Dyetmars des Gafferswenz Prueder, dem got genade Vergich - Das ich - durch Got mir vnd allen meinen vodern ze hilf vnd ze trost han gewidemt vnd gegeben ouf der heiligen zwelf poten alter in der vrowen Chloster ze der Hymelporten ze Wienne ze einer ewigen Messe meines aygenhaften guetz - Ein halbes Jeuch weingarten, leit an dem perge, der da haist der Miesenchobel vnd haist der weingarten der Cheschinch, do von man alle iar dient ze Perchrecht einen Emmer weins vnd drey wienner phenninge ze voitrecht; vnd Nevn Phunt wienner phenninge purchrechtes, Der ligent drev phunt geltz ouf der Waldnerinne Hovs bey dem lichtensteg, es leit ein phunt gelts ouf hern Hainreichs des Chantzler hous ze naest dem waghovs an dem hormarcht. So leit ein phunt geltes ouf des Eysengraetleins Hovs, vnd haist in der Gugel bei Stubentor. Vnd leit ein phunt geltes ouf hern Davidis des Scheuchen Hovs ouf dem Cholmarcht. Vnd liegent zway phunt gelts auf der Rudlinne Hovs der Veltzbergerinne in der Svningerstrazz vnd ist weilant des Chran gewest. Vnd ein phunt geltes leit ouf hern Chunratz des Tuechscherer Hovs, daz da leit bei des Scherautz gewant Cheller an dem Hohenmarcht, Daz mir mein swester Junchfrowe Percht an irn lesten zeiten hat geschafft vnd geben - Vnd han die ingeantwort vnd enpholhen Dem Erbern herren hern Dietreichen, ze den zeiten Chorherre ze sant Stephan ze Wienne Also mit ouz genomen Worten, daz er die Messe auf dem Alter alle tag an vnderlaz; in irre danne Ehaft not, svl sprechen vncz an seinen Tot. Vnd svl chain recht an dem Opher ovf dem alter an der vrowen willen haben. Er mag auch wol in demselben rechten, ob er wil, einen verweser an seiner stat zu der Messe gewinnen. Vnd svl vmb mich vnd vmb mein vodern piten, als er Got an dem Jungesten Tag dar vmb svl antwurten. Vnd nach desselben hern Dietreichs tod sol annder nieman, danne die vrowen ze der hymelporten die wal haben, vnd die schullen alz oft vnd ein Priester abgestirbt, einen andern gestanden vnd erbern wertleichen Priester zu der gvlt vnd zu der Messe ouf dem vorgenanten Alter erchiesen vnd erwelen nach irn trewen in den ersten Sechs Maeneiden oder E, vnd wen si erwelen, den sol wer Pischolf ist ze Pazzow, bestaeten, als geistleicher Ordenung recht ist, Also daz die Messe von dem Weingarten vnd von der Gult ewichleich alle tage an vnderlazz, ez irre danne Ehaft not ouf dem alter werde gesprochen vnd begangen, alz vorgeschriben stet. Waer aber, ob derselb priester mit seinem leben sv gar vngeordnet vnd vnrichtig waer, vnd des mit Erbern leuten vber waert wurde, oder ob er die Messe fraefelleichen an ehaft not, die wizenleich waer, wolt sovmen, vnd die mit im selben oder mit einem verweser nicht verginge, so svl in, wer pischolf ist ze Pazzowe, absetzen und vercheren, Darnach vnd die vrowen die sovmunge mit einer gewizzen an in pringen, Vnd schullen danne die vrowen einen andern erbern gestanden wertleichen priester erchiesen vnd erwelen - Waer aber ob die vrowen, alz oft ein priester stirbt oder von seiner vnfuer verchert wirt, einen andern wertleichen Priester in sechs Maeneiden nicht erwelten, Alz oft svl wer Pischolf ze Pazzow ist, selb einen priester zu der gult vnd zu der Messe erwelen vnd besteten. Wolde aber der Pischolf daz ouch sovmen, oder ob sich die vrowen der gult vnd des weingarten wolden vnder winden da von die Messe gesovmt wurde, so sol derselb weingarten vnd die gult meinen naesten vreunden ledig sein. Teten si des auch nicht, so soll die gult vnd der weingarten den Siechen ze sand Lazer vnd zu dem Chlagpaum ledigleichen sein vervallen - Vnd wann man die drev phunt geltz ouf der Waldnerinne Hovs ablost, so svl man drev phunt ewiges purchrechtes chovffen vmb dis gelt, damit man ablost - So gib ich - dar vber disen prief versigilt mit meinem Insigel vnd mit der vrowen Convent Insigel zu der Hymelporten ze Wienne, vnd mit der Erbern herren Insigeln hern Mathes, zu den zeiten Pharrer ze Stilfride, hern Hainreiches, ze den zeiten Phfarrer ze Weichendorf, hern Petreins ze den zeiten Chapplan ze der Drivaltichait, hern Hagens von Spilberch, hern Herbarts auf der Seule, hern Fridreichs des Gnaemhaertlein vnd hern Jacobs, des Maeserlein - Der prief ist geben ze Wienne - Dreuzehen hundert Jar in dem sechs vnd dreizzigisten Jare an sant Kathreyn Tag. ||
Et nos Albertus Dei gracia Patav. Epus. laudabilem intencionem prefati Nycolai in domino comendantes ac omnia et singula prenarrata, prout superius exprimuntur, grata et Rata habentes, Ea auctoritate ordinaria cum appensione nostri Sigilli ex certa sciencia confirmamus. Sub A.D. Millimo Tricentesimo Tric. Sexto in Crastino beati Nycolai Epi.

Source Fulltext: ZEIBIG, Klosterneuburg (=FRA II/10, Wien 1857) S. 259-261