Ich Fridreich der Motzhan vnd Ich Margret sein hausvrowe vnd Ich Mert, sein Ohaym vnd Ich Katrey, sein hausvrowe Wir veriehen - Daz wir vnd vnser erben vnverschaidenleichen gelten schullen der erbern vrown vron Margreten, Otten witibe von La, dem Got genade In der Schefstrazze vnd irn erben Sechzehenthalb phunt phenning Wienner Mu^enzze, der wir sei recht vnd redleichen weren schullen an geverde vnd an alles vertzihenusse auf sant Georigen tag, der nu schirist chumt, vnd haben ir durch pezzer sicherhait da fu^er ze phande gesaczt - mit vnsers Perchmaisters hant hern Weycharts von Mulbach zu den zeiten Amptman vnd phleger der Cappellen In der Pu^erge ze Wienne vnsern weingarten, Der da leit pei der heiligenstat an der Obern Pru^ekche, des ayn viertail ist, vnd haizzet der Motzhan, da von man dient alle Jar vierdhalben wienner phenning In die vorgenant Cappellen, hincz sand Chlaren vierdhalben wienner phenning, vnd fvmfzehen wienner phenning hern Chvnraten dem Nuzdorffer vnd aynen Emmer weins vnd aynen phenning ze voyt rechte hincz Newnburch vnd nicht mer - So beschaydenleichen, ob daz wer, daz wir sev der vorgenanten phenning gar vnd genczleichen nicht enwerten auf den egenanten tag, als in die werunge gevallen schol, so ist In der vorgenante weingarten recht vnd redleichen vervallen - Dar vber so geben wir In disen prief - versigelten mit des vorgenanten vnsers perchmaisters Insigel, hern Weycharts von Mu^elbach, vnd mit hern Chunrats insigel an dem O^ebern Griezze - Diser prief ist geben ze wienne - Dreutzehen hundert Jar, dar nach in dem Syben vnd dreizzigisten iar an dem Vaschang tage.

Source Fulltext: ZEIBIG, Klosterneuburg (=FRA II/10, Wien 1857) S. 263