Ich Stephan der Redeprunner vnd Ich Katrey sein hausvrow vnd vnser paider erben wir veriehen - daz wir - mit vnsers Purchherren ze den Zeiten Probst Ru^edweins hant von Newnburch recht vnd redleich gesaczt haben ein Lehen, daz wir haben dacz Stoiczendorf, daz da leit auf der stetten, vnd drey weingarten, die in daz lehen dient zwain vnd dreizzich phenning, Vnd die obern zwo hofstet pei dem haus dacz Stoizendorf - da man dem Gotshaus vnser vrawn hincz Newnburch dreizzich phenning von dient an sant Michels tag zu rechtem Gruntrecht Jansen dem Redeprunner vnserm sun vu^er Sibenczich phunt phenning wienner munzze. Also beschaidenleich, daz ich - daz oft genant lehen von im lO^esen schullen In drein Jaren vmb Sibenczich phunt wienner mu^enzze, Auch wer daz Lehen von im lO^est, der schol die selben phenning nemen vnd schol dorvmb ein gult chauffen, vnd schol daz geschehen mit des oft genanten Jansen vnsers suns des Eltern rat vnd willen. Er schol auch daz vorgenant Lehen nicht auz der hant geben, vncz daz im die gult werd in geantwurt an allen Chrieg, vnd schol auch die selb gult inne haben vncz an sinen tod. Wer aber daz, daz er heut oder morgen nicht Enwer, so schol die selb gult halbev erben an vns oder an vnser erben, vnd mit dem andern halben Tail schol er schaffen pei seinem Lemptigen Leib , waz er well - Wer aber daz, daz ich - daz oft genant Lehen vnd waz dar zu gehort, nicht lO^esen moehten noch wollten in drein Jarn, So schol ez dem oftgenanten Jansen vnserm sun, dem Eltern vervalln sein an allen Chrich - Wer aver, daz Er nicht beraten wurd Churczleich, Oder daz er die Priesterschaft verwarcht, oder daz er nicht priester wolt werden, des got nicht geb, So schol er die vorgenant gult, oder daz Lehen werfen in gleichen Erbtail, vnd schol als gu^eten tail haben als andrev sein Geswistreid. Vnd daz die red also Stet vnczebroehen beleib, geb wir in disen prief versigelt mit mein Stephans des Redeprunner Insigel vnd mit meins suns Christan Insigel, vnd mit meins aydems Pauln Insigel des Inpruchker vnd mit meins suns Vlreich Insigel, vnd mit meins suns Jansen Insigel des Jungern. Vnd mit des Purchherren ze den zeiten Probst Rudweins Insigel von Newnburch - Der prief ist geben - Tausent Jar, drevhundert Jar darnach in dem Newn vnd Dreizzigisten Jar an vnser vrawn tag ze der Chvnndnuss.

Source Fulltext: ZEIBIG, Klosterneuburg (=FRA II/10, Wien 1857) S. 271-272